SARIKEI: Dua buah sekula ba pelilih tu udah mujur ngerikod sejarah kediri sepengudah dirintai nyadi Sekula Menua Pesisir Ti Manah Prestasi ba selampur nengeri Sarawak.
Dalam kategori nya, Sekula Sekondari (SMK) St Anthony Sarikei udah mujur bulih penuduk lumur dua ke lalu ditangkan SMK Tinggi Sarikei ba penuduk lumur tiga.
Dalam lis nya, nengah pemutus peresa Sijil Pelajaran Malaysia (SPM) 2018 ke udah pansut kilah ensana, SMK St Anthony Sarikei mujur bulih Gred Puku Rata Sekula (GPS) 3.32, lalu SMK Tinggi Sarikei bulih GPS 3.59.
Kelimpah ari nya, ungkup kategori Sekula Bisi Potensyel Nyulut, SMK St Antony Sarikei ba penuduk kesepuluh lalu ditangkan SMK Tinggi Sarikei ba penuduk kesebelas.
Prinsipal SMK St Anthony Sarikei Vincent Liong Shou Chuan madah, dalam pemutus SPM 2018, bisi 21 iku nembiak di sekula nya udah bulih pemutus A- dalam semua subjek.
“Ba taun tu, peratus pas penuh SPM iya nya 97.73 peratus, lalu 90.15 peratus iya nya ti pas semua subjek.
“Sepenyampau 264 iku chalun udah napi peresa SPM 2018 ungkup SMK St Anthony Sarikei,” ku iya.
Bejaku bekaul tikas penyulut nembiak ba SPM 2018, Liong madahka iya andal enggau pemutus sekali tu.
“Pemutus ti udah mujur dirikod sekali tu iya nya nyadika kelai kerejasama semua raban kelebih agi bala nembiak, pengajar enggau apai indai ti pemadu manah ke udah ngujungka bulih pemutus bansa tu.
“Komitmen ke penuh ari chalun ti napi peresa nya mega nyadi pekara ke berat ti ngasuh bulih pemutus ke manah tu,” ku iya nyemetak.