KUCHING: Kaunsil Pemansang Ekonomi Sarawak (SEDC) nyain sempekat pemereti ati (MoU) enggau Johor Corporation (JCORP) ngambika bekerejasama ngemansang sektor agro-dagang, nupi jelu sereta industri ngemansut pemakai.
Chairman SEDC, Tan Sri Datuk Amar Abdul Aziz Husain madah, pengawa nya seriris enggau beberapa atur strategi perintah nengeri dikena nentuka Sarawak nyapai juluk nyadi pengeksport besai pemakai di Malaysia nyerumba taun 2030.
Ku iya, SEDC udah lama ngaul diri dalam industri nupi jelu nyengkaum chapi dagin, manuk dagin enggau telu ke nerima sambut kelebih agi ari raban bansa bumiputera di nengeri tu.
“Ladang nupi lembu kami bepalan di Australia lalu SEDC ngempu beberapa stesyen nupi ari baruh kemata anak kompeni iya nya Rosewood Station Pte Ltd ti udah menang sekeda anugerah.
“Kami bela nerima peminta ke tinggi ungkup bekal daging manuk enggau chapi ke udah diproses, tang kapasiti bekal kami mengkang kurang dibanding enggau penyampau peminta ke bisi ba makit.
“ Nya kebuah, kami ngembuan juluk deka ngerembaika agi bidang dagang tu nengah pengandal ke tinggi ke alai asil ti diulih dijangka mayuh agi nengah konsep program manuk begulai enggau kaban kunsi kami (JCORP) ke baru tu,” ku iya ba pengerami Nyain MoU entara SEDC enggau JCORP di sebuah hotel ke tebilang ditu, malam ensanus
Ku Aziz, iya bisi dip adah ke alai JCORP mega bisi n gaul diri sechara besai dalam bidang betanam betupi.
“Nya alai,besai amat pengarap kami nyema SEDC enggau JCORP ulih mansik dagang nengah chara begulai dalam bidang tu kelebih agi kebun bedandang besai nenas tauka buah ke bukai,” ku iya.
Berebak enggau nya, Presiden ke mega Ketuai Eksekutif JCORP Dato’ Kamaruzzaman Abu Kasim madah, nengah MoU nya, JCORP enggau SEDC deka sama bekunsi pengelandik enggau pemansut nyerungkai peluang sagang ti deka meri pemaik enggau penguntung ngagai kededua piak.
Kerejasama strategik nya ku iya, bela mungkur pekara pemansang orang dagang, bidang bejalaika pengawa enggau servis sereta pekara bekaul enggau dagang agro betanam betupi nengah chara ke besai agi.
“Tu setipak enggau pengawa kami ke sama besaup ngena pemansut, ngemansutka puku, bidang engau pengelandik ke udah tentu meri empas sereta pemaik ngagai menua,” ku iya.
MoU nya disain Menijar Besai SEDC, Abdul Hadi Datuk Abdul Kadir enggau Mandal Presiden Divisyen Pemansang Dagang, JCORP, Mohd Sahir Rahmat seraya dikemataka Abdul Aziz dan Kamaruzzaman.