KUCHING: Sarawak nengah mengeri besai Kuching, nyadi nengeri keterubah di Malaysia diaku nyadi ‘Bandar Kraf Dunia’.
Menteri Dagang Temuai, Seni, Main Asal, Nembiak enggau Lumba enggau Main,Datuk Abdul Karim Rahman Hamzah madah, mengeri besai Kuching ke nyadi Bandar Kraf Dunia besai amat reti sereta beguna, kelebih agi laban 2019 taun Kimpin Nemuai Sarawak.
Mengeri besai Kuching diaku nyadi Bandar Kraf Dunia kena 28 November 2018, senipak bendar enggau Sarawak ti mayuh penyelai enggau pengaya ba asil pengelandik jari ti bisi identiti kediri bepelasarka jalai pengidup 27 etnik di nengeri tu, ku iya.
“Kitai amat temegah ati nyadi nengeri keterubah di Malaysia diberi tauka diaku nyadi ‘Bandar Kraf Dunia’.
“Tu beguna amat sereta besai reti ngagai semua kitai laban tu meransang sereta ngangkatka Kimpin Nemuai Sarawak ke benung dipejalaika.
“Baka ke dipadah ngagai aku mengeri besai Kuching (dalam kraf) deka sama tikas enggau mengeri besai antarabansa baka Jaipur di India, Jogjakarta di Indonesia enggau lebih 30 mengeri besai di serata dunya,” ku iya seraya madahka Kuching tebilang nyadi pintu penama ngagai Borneo.
Abdul Karim madahka pekara nya lebuh bejaku seraya bejadika Conferment On Kuching As City For Crafts By World Crafts Council ke diatur ba Auditorium Kort Lama Kuching ditu, kemari.
Iya madah, Kuching kelebih agi Sarawak nyadi menua ti tebilang dipilih orang ari serata dunya ti rinduka seni enggau barang pengelandik jari, asil seni sereta pengumpul barang lama.
Nambahka nya, Sarawak nengeri ke chukup manah dilawa lalu rayat ti enda ngira pupu bansa ulih idup dalam pemaik enggau pengelantang, ku iya.
“Aku ngasaika tu mih sebengkah ari kebuah narit ari Presiden Kaunsil Kraf Dunya, Kandang Asia Pasifik (WCC-APR) Dr Ghada Hijjawi Qaddumi enggau Penyanding Penemu WCC-APR Datin Raja Fuziah Raja Tun Uda ke nyadi entara panel tebilang datai ke Kuching ba bulan Oktober taun nyin kemari nemuai seraya ngaga perati sida,” ku iya.
Kelimpah ari nya, ba Abdul Karim mega bepenemu mengeri besai Kuching patut bisi palan pengelandik jari baka Palan Kraf Jari Miri.
“Kitai patut bisi Palan Kraf Jari di Kuching baka ke udah bisi di Miri. Tu deka dikemeratka aku, lalu aku deka bejaku enggau YAB Kepala Menteri iya nya kitai begunaka Palan Kraf Jari ti besai agi di Kuching.
“ Palan Kraf Jari Kuching tu ila diperambu endur mandangka produk pengelandik jari ari mayuh bengkah bansa kelimpah ari nyadi one stop center dikena matak penatai temuai,” ku iya.
Sama bisi datai ba pengerami nya kemari Menteri Muda ba Opis Kepala Menteri (Undang-undang enggau Adat Bumiputera) ti mega nyadi Chairman Kaunsil Kraf Sarawak, Datuk John Sikie Tayai disempulang bini iya Datin Melia Gelen, Dr Ghada, Raja Fuziah, Presiden Society Atelier Sarawak Edric Ong sereta raban Penyanding Penemu Society Atelier Sarawak sereta ke bukai.