BETONG: Kaban Kunsil Nengeri (ADUN) Layar Gerald Rentap Jabu madah ngagai rayat di Betong ke alai sida deka terus ngasaika pemansang ke diperambu asil ari pengawa ke dikereja perintah.
Ku iya, mayuh pemansang udah diatur sereta dibai ke Betong ungkup rayat ti begunaka lalu ke pemadu baru iya nya muka kampus sementara Pusat Kecemerlangan Teknikal Sarawak (CENTEXS) ditu.
“Nyadi ADUN sitak Layar aku meri besai terima kasih ngagai perintah GPS ke ari baruh embing Kepala Menteri Datuk Patinggi Abang Johari Tun Openg ti ngembuan penyiru sereta meri sebuah agi institusyen pengelandik di Betong tu ke nyadi palan alai ngansah pengelandik bala nembiak ditu sereta ilalu muka peluang kereja ngagai sida.
“Pelajar ditu nadai begunaka tikas akademik ke tinggi sereta meri peluang ngagai nembiak ti udah nembuka SPM enggau ti enda nampung pelajar mega dikelalu tama ngagai CENTEXS Betong.
“Ba awak ke sama kitai ngarapka pengawa numbuhka kampus tetap ulih duigaga ditu laban bisi tanah endang diungkupka ngagai CENTEXS Betong,” ku iya.
Iya bejaku munyi nya lebuh dikerandau pengarang berita ngenang sentang pengawa muka kampus sementara CENTEXS Betong ditu, apin lama udah.
Ku iya, agi mayuh pemansang benung digaga nyengkaum mutarka penanggul ampuh bah tunggal ke suah nyadi ba sekeda endur ujung-ujung tu.
“Siti pemar ditapi kitai iya nya penambah ba penyampau tubuh enggau pasar ke lama, kitai ngarapka pansik ke betul dipejalaika opis ke bekaul kelebih agi Opis Parit enggau Entali Ai (JPS) sereta Opis Pelilih Betong (MDB) ngambika ngaga sistem parit dikena mutarka penanggul nya.
“Siti indu pelin ke silik deka dilangkar nengah pansik ke betul dikena mutarka penanggul parit sereta berandau enggau ejensi ti bejalaika pengawa laban kitai udah bulih pemendar ari Kepala Menteri mutarka penanggul nya.
“Kitai mega beasai sinu amatmeda penanggul ke ditapi rayat maya hari ke enda ngengetu ujan tauka pasang besai ti ngujungka nyadi bah tunggal.
“Kandang endur ke nadai kala kena bah tunggal pan bisi dikena rampit ketegal penyampau tubuh enggau pemansang ke enda diperambu manah.
“Nya alai ejensi ti bejalaika epngawa nya enda tau enda ngaga pansik dini alai ai tekandang enggau kini penunga ai nya parut rarat.
“Nyema ai nya rarat ke sungai pan meseti bisi pansik ke betul, “ ku iya.