MIRI: Opis Menteri Betanam Betupi Moden, Tanah Adat enggau Pemansang Kandang Menua benung mansik pematut kandang menua endur bumai di Long Semadoh enggau Ba Kelalan ti dituku nyadi Sistem Pesaka Betanam Betupi Berat Tikas Global (GIAHS).
Sekretari Tetap opis menteri nya Datu Ik Pahon Joyik madah, sida taun nyin kemari bisi ngabas Long Semadoh enggau Ba’ Kelalan dikena meda chara nanam enggau ngetau padi sereta mansik sekalika kandang menua tu ulih dituku ari baruh GIAHS.
Ku iya madah, GIAHS ti ditumbuhka Gempung Pemakai enggau Pengawa Betanam Betupi (FAO), iya nya sebuah ejensi ari baru Pertubuhan Bangsa-bangsa Bersatu (PBB) ti mai tuju nyaga chara bumai asal.
“Beserimbai enggau nya, kitai deka terus ngabas jemah ila lalu ngelangkar pelin dikena ngenukuka chara nanam padi ba kandang menua nya kelebih agi Ba’ Kelalan.
“Nyema bulih gelar tu ari PBB, Ba’ Kelalan deka ditemu orang ba mata dunya nyadi sebuah kandang menua ti agi ngetanka pengawa nanam padi ngena chara asal,” ku Ik Pahon lebuh ti bejaku bejadika Karinal Berau Adan Ba’ Kelalan 2019 di Kampung Buduk Nur, Ba’ Kelalan kemari.
Ku iya nambah, naka ke diatu bisi 57 kandang menua ba 24 menua udah ditukuka GIAHS.
Ku iya, pengawa nanam padi di Ba’ Kelalan ngembuan potensyel besai ti ulih dituku GIAHS laban penyelai pengawa nanam iya nya nenga ai ari bukit, ngena baja sereta diintu ngena chara organik.
“Penyelai berau Adan Ba’ Kelalan deka dituku. Nya alai semua raban orang bumai patut bekerejasama ngetanka penulin berau enggau pengawa nanam organik,” ku iya.
Bekaul pengawa ngatur Karnival Berau Adan Ba’ Kelalan nya, Ik Pahon madahka nya ulih nyadi ikon baru ngagai Ba’ Kelalan.
Ku iya, kelimpah meri kelala berau Adan, nya ulih mantu nyungkak aktiviti eko dagang temuai di Ba’ Kelalan.
Ik Pahon ngarapka Opis Betanam Betupi Sarawak (DOA) ulih meri agih belanja ti nyadi peransang komuniti dikena ngatur karinival ti sama taun nyin ila.
Kelimpah ari nya, iya meri buah penemu ngambika peranak di Ba’ Kelalan ngerembaika agi pengawa betanam chara organik sayur sereta buah dikena nambahka penatai pemisi kelimpah ngaul diri dalam pengawa betanam komoditi baru baka nanam kupi.
Urung 250 iku pesereta ari 11 buah genturung pendiau di Ba’ Kelalan udah ngemujurka pengerami nya ti keterubah diatur komuniti Lun Bawang.
Sama bisi diatur iya nya pekit nutuk padi nyentukka nyadi berau, muai sekau padi dalam berau, mungkus asi tauka nuba laya’ sereta pekit ngagai enggau nangkap itit dalam umai.
Batang tuju pengawa nya diatur dikena ngelakuka Ba’ Kelalan nyadi hab pemansut berau Adan ti pemadu manahm bekualiti enggau seratus peratus organik.
Kelimpah ari lumba enggau main asal ti ngena tema padi enggau berau, sama bsi diatur mega iya nya pengawa pemandag mayuh macham berau ti mekuh ngagai berau Adan, nyual berau enggau produk ti digaga ari berau, garam bukit, nyual asil pengelandik jari sereta malam main asal.
Sama datai iya nya Direktor Opis Menteri Dagang Temuai enggau Main Asal Malaysia Nengeri Sarawak Suriya Charles Buas, Sapit Direktor Opis Betanam Betupi Sarawak (Sektor Modenisasyen) Wilson Entabang, ketuai komuniti Ba’ Kelalan Penghulu George Sigar Sultan enggau tuai rumah Long Muda Yudan Meru.