Dikarang Rengenyan Labang
KUCHING: Sarawak semina deka ningkilka leka jaku 'nengeri' enti ubah ba Perkara 1(2) Perlembagaan Persekutuan udah dikemendarka.
Kepala Menteri Datuk Patinggi Abang Johari Tun Openg (gambar) madahka ke diatu leka jaku 'nengeri' agi ulih dikena tang enti Perlembagaan nya udah diubah Sarawak ukai disebut nyadi nengeri.
"Enti ubah ngagai Perlembagaan nya digaga, nya baru kitai ngemeranka tauka berengkah bejalaika iya (ningkilka leka jaku 'nengeri').
"Ari nya, kitai ukai agi nyadi 'nengeri' tang 'wilayah'. Lalu, Sarawak dalam Malaysia agi dikena," ku iya nyaut enggau pandak lebuh dikerandau raban pengarang berita pasal pekara nya.
Abang Johari dipinta meri penerang bekaul enggau riput sebuah surat berita ti madahka iya ba Betong apin lama ngaga pemutus ningkilka leka jaku 'nengeri' dalam semua surat rasmi perintah.
Dulu ari nya abang Johari bejadika 'Sarawak Career and Training (SCaT) Fair 2019' ke diatur ba BCCK berengkah 15-17 Mac 2019.
Beberapa hari ke udah Menteri ba Opis Menteri Besai (Undang-undang) Datuk Liew Keong madahka Kabinet besetuju ngubah Perkara 1 (2) Perlembagaan Persekutuan ti nyadika Sabah, Sarawak enggau Semenanjung Malaysia nyadi 'rakan kongsi'.
Ubah perlembagaan nya dibantaika ba aum parlimen ti berengka 11 Mac apin lama.
Lalu dikena nentuka ubah nya dikemendarka, begunaka sukung dua pertiga majoriti Kaban Parlimen ba Dewan Rakyat.