Anda di sini

CNS ngarapka polisi ngurang penyampau staf perintah nadai ngetuka orang gawa

Advertisement

KUCHING: Kongres Kesatuan Pekerja-pekerja Dalam Perkhidmatan Awam (CUEPACS) Nengeri Sarawak (CNS) ngarapka polisi ngurangka penyampau staf perintah  enda mungkur pengawa ngetuka orang gawa, dipejalaika enggau chara ke manah.

Chairman CNS, Ahmad Malie ngarapka penerang tauka polisi ke diterangka Ketuai Direktor Pengereja Pengawa Perintah (KPPA) bekaul enggau polisi ngurangka penyampau staf perintah ti nadai ngetuka orang gawa, dikeamatka perintah.

Nyema polisi ngurangka penyampau staf perintah  nya mungkur pengawa ngetuka orang gawa, dia isu rayat  ke nadai kereja majak deka nyadi, ku iya.

“CNS ke bendar nyukung juluk perintah ke deka rayat ngurangka penyampau staf perintah  baka ti dipadahka YAB PM kitai apin lama udah. Tang CNS berasai lantang ati pengudah diterangka KPPA ke alai pengawa ngurangka penyampau staf perintah enda mungkur pengawa ngetuka orang gawa.

“CNS meri terima kasih ngagai perintah nengah KPPA laban udah ngelantangka ati pengereja pengaa perintah ke bisi irau mimit enggau pekara ke dibantaika perintah pasal ngurangka penyampau staf perintah.

“CNS ngarapka polisi ngurangka penyampau staf perintah  ti enda mungkur pengawa ngetuka orang gawa, dipejalaika enggau chara ke manah.

“Kami (CNS) amat ngarap pekara ke diterangka KPPA nya dikeamatka perintah dikena nyaga pengelantang pendiau pengereja pengawa opis perintah ke benung gawa jemah ila,” ku iya.

Ahmad mansutka pekara nya lebuh ditanya Utusan Borneo  bekaul enggau isu nyaga penyapau pengereja pengawa ke dibantaika ba Parlimen apin lama.

“Tambah mega, bepelasarka perati CNS, timpuh dua tiga taun tu iya nya taun mayuh mayuh  pengereja pengawa  perintah pichin ari mayuh bengkah ejensi,” ku iya seraya madah sebedau ninga penerang silik ari KPPA pasal polisi nya, CNS enda setuju.

Bejaku baru Ahmad madah, ba CNS pichin nengah chara pejal tauka pilih iya nya siti trend ngurangka penyampau staf perintah ti enda diisi baru.

Taja pia CNS ngarapka sektor tauka ejensi ti enda ngetu begunaka pengereja pengawa baka sektor pelajar, pengerai, polis enggau soldadu patut diganti sereta diisi enggau lengkas nyema bisi puang ketegal pinchin, dikena nentuka kualiti enggau pengelikun rayat menua tu.

Bepelasarka ripot berita sebengkah portal apin lama, di Putrajaya, Opis Orang Kereja Perintah (JPA) bebendar madahka nyaga penyampau staf perintah dalam timpuh tiga taun berengkah 2019 ngagai 2021 engka mungkur pengawa ngetuka pengereja pengawa.

Tang (ku JPA) nya semina mungkur pangku pengawa ti enda diisi ngelui ari timpuh dua taun.

“Chara nyaga penyampau staf perintah  iya nya nengah chara ngaga nyadi kompeni pribit, nusun baru pangku pengawa enggau nyerahka atur pengawa.

“Nambahka nya nengah meri servis alternatif, automasyen sereta ngisi pangku pengawa nengah chara ke manah nitihka pematut,” ku JPA nengah penerang berita apin lama.

Advertisement