KUCHING: Kandang menua Serian kelebih agi Tarat deka bisi siti agi palan dagang temuai ke manah pengudah Borneo Empurau Farm tembu dikemansang sereta dibuka kena bulan November taun tu.
Borneo Empurau Farm diatu benung dikemansang ba kaki Gunung Sadong urung iya 60 kilometer (km) ari mengeri Kuching nengah Jalai Kuching-Serian.
Bekonsepka agro dagang temuai, palan nya ku pengempu Dato Yong Fook Heng deka disikap enggau 31 unit chalet, sebuah restoren ti ngidangka empurau ba rega ke ulih dibeli sereta sebuah rumah panjai 18 pintu.
Kelimpah ari nya, palan nya mega deka disikap enggau utai bukai baka ai wong gaga, taman endur kuda, zoo mit, taman tema ai mit, palan akuaponik, trek kampung, kebun buah enggau sayur organik sereta akuarium ikan ai sungai Borneo.
“Ikan empurau, ikan tilapia hibrid, ikan emas enggau undang galah bela bisi ditupi ba palan nya,” ku Yong madah lebuh Opis Betanam Betupi Nengeri Sarawak bisi nemuai ngagai endur nya apin lama udah.
Sama bisi enggau ba penemuai nya Menteri Muda Betanam Betupi , Dr Abdul Rahman Ismail, Menteri Muda Pemansangun Tanah Adat, Datuk Roland Sagah sereta Direktor Betanam Betupi Sarawak, Dr Alvin Chai.
Berebak enggau nya, penyanding penemu Borneo Empurau Farm, Dato Rahman Lariwoo madahka palan nya deka matak penatai temuai ke betikas entarabansa.
Lebuh palan nya dibuka dalam bulan November taun tu, palan nya mega dipechaya deka ngerichahka aktiviti ekonomi kelebih agi ba sitak Tarat enggau Serian.
Borneo Empurau Farm mega bekerejasama enggau Universiti Sultan Zainal Abidin, Terengganu ngasilka ikan tilapia hibrid sereta Universiti Malaysia Sarawak (UNIMAS) ba pengawa ngaga sistem akuaponik.
Raban bejalaika pengawa ba palan nya mega merambu deka bekerejasama enggau Opis Betanam Betupi Sarawak ngemansangka akuakultur empurau enggau undang galah.