KUCHING: Projek perengka pengangkut mensia mayuh ti benung dikemansangka Kaunsil Pemansang Ekonomi Sarawak (SEDC) iya nya bas ngena hidrogen deka beroperasyen kena April tu ila.
Chairman SEDC, Tan Sri Datuk Amar Abdul Aziz Husain madah, kelimpah bidang betanam betupi, sida mega fokus ngagai bidang memproses sereta servis perengka pengangkut.
“Siti projek SEDC diatu ke benung dikemansangka iya nya bas hidrogen ke deka beoperasyen dalam bulan April 2019.
“Projek perengka pengangkut mensia mayuh nya deka bejalai mungkur beberapa iti batang jalai di mengeri Kuching. Nya deka meri pemaik ngagai mensia mayuh ditu sereta mega bala temuai ke deka nemuai kitu,” ku iya ba pengerami Nyain Sempekat Pemereti Ati (MoU) entara SEDC enggau Johor Corporation (JCORP) di sebuah hotel tebilang ditu, malam ensanus.
Berebak enggau nya, Abdul Aziz madahka SEDC deka ngemujurka projek ngaga Kilang Metanol di Bagi Menua Bintulu.
“Pengawa ngaga kilang nya nyadi siti agi projek besai ti di pejalaika SEDC dalam sektor minyak enggau gis,” katanya.
Ku iya, SEDC mega benung mansik pemansang dagang temuai pengerai ungkup jemah ila.
Ku iya, bisi potensial besai dalam industri nya baka ke dipeda ba sekeda menua Asean ke bukai.
“Naka ke diatu, mayuh temuai ari menua ke besemak baka Kalimantan Barat, Indonesia udah ngulihka servis perubat ke bekualiti ba sepital peribit nyengkaum Normah Medical Specialist Centreke mega anak kompeni SEDC,” ku iya.
Kelimpah ari nya ku iya, SEDC udah bejalaika pengawa nyadi pengemun sereta nyadi penegap dikena meransang pemansang ekonomi nengeri Sarawak ti tau diubah nengah transformasyen ekonomi digital.
“Ubah ekonomi asal Sarawak nyadi ekonomi digital te tegap mantap endang asil ari visyen Kepala Menteri Datuk Patinggi Abang Johari Tun Openg ke nyukung teknologi baru nyadi pemadah, komuniti enggau teknologi dikena betan dalam dunya dagang ke majar mar,” ku iya.
Sama bisi datai, Presiden enggau Ketuai Eksekutif JCORP Dato’ Kamaruzzaman Abu Kasim, Menijar Besai SEDC Abdul Hadi Datuk Abdul Kadir enggau Mandal Presiden, Divisyen Pemansang Dagang, JCORP, Mohd Sahir Rahmat.