SIBU: Bisi 11 iku graduet ari Program Belajar Jaku English nyengkaum semilan pengelicha ari Fakulti Keguruan Ilmu Pendidikan Universitas Tanjungpura, Indonesia (UNTAN) udah ngaga pengawa begulai akademik ngagai Palan Pematih Pengajar (IPG) Kampus Rajang di Bintangor kena 2 ngagai 4 Mac tu tadi.
Pengawa begulai akademik nya nyadi siti ari pelasar ungkup gradeut UNTAN enggau graduet IPG betukar penemu enggau bekunsi peneleba bekaul gaya belajar ba kededua buah institusyen nya.
Raban sida ti betuaika Ketuai Opis Pelajar Jaku English UNTAN Dr Urai Salam bisi madahka nya program begulai ti ulih ngerapitka kaul entara kededua institusyen ba renggat antarabansa kelimpah ulih nyungkak pengawa bekunsika main asal ungkup kededua menua nya.
TIm TESL IPG Kampus Rajang sama bisi ngatur sekeda program dikena nyapai objektif program begulai nya.
TIm UNTAN ngepunka hari keterubah sida enggau ngabas rumah panjai iya nya Rumah Ngabong di Sebangkoi, Sarikei.
Penatai sida diterima manah sereta rami ari peranak rumah panjai nya.
Sida mega bisi peluang meda kediri main asal bansa Iban ti agi dinanka nyentuk diatu baka nebah kereban muzik asal, nenun pua kumbu sereta nganyam tikai enggau asil pengelandik jari ke bukai.
Kelimpah ari nya, program ‘Meet and Greet’ udah diatur ba hari ti sebaka lalu bala graduet UNTAN enggau graduet IPG Kampus Rajang mantaika pengelandik sida dalam tanda asal sereta belagu.
TIm Jaku Iban Semester 4 IPG Kampus Rajang sama bisi meri buah runding dikena ngemujurka program nya.
Dr Urai madahka iya deka terus ngatur program ti ulih ngaul graduet kededua institusyen nya jemah ila.
Beserimbai enggau nya, pengawa nyain setipikit entara Direktor IPG Kampus Rajang Dr Lambat Lindong enggau Dr Urai nyadi kelai bejadi program begulai nya.
Asil ari pengerami nya, Dr Lambat Lindong ngarapka raban UNTAN deka terus ngatur pengawa nemuai ti bepelasarka akademik bansa nya.
Dikearap tiap input ti dikunsi ulih meri pemaik ngagai tiap iku sida.