BAU: Sarawak enda ulih bepanggai sereta nganti pemutus sentang bayar royalti minyak enggau gis ari lima peratus ngagai 20 peratus, ke diatu lalu nadai mandangka kelai positif.
Kepala Menteri Datuk Patinggi Abang Johari Tun Openg madah, isu royalti minyak enggau gis ke dipinta Sarawak berengkah kenyau ari ex- Kepala Menteri Niang Pehin Sri Adenan Satem (Tok Nan) nyentuk ke diatu, lalu nadai dipeda bisi pemansang.
“Royalti kitai baka ke nadai nginsit, ke ulu enda ke ili pan enda...nadaisebarang pemutus kenyau ari pegai Tok Nan nyentuk ke iya nadai.
“Kitai nadai pilih bukai kelimpah regas ba pemun industri minyak enggau gis sereta industri produk bukai ke ari nya nyengkaum neritka chukai nyual lima peratus ba produk petroleum,” ku iya berjaku ba Pengerami Begulai enggau Ketuai beserimbai enggau Makan Lemai Taun Baru China 2019 DUN Serembu di Dewan Mensia Mayuh Siniawan ditu, malam ensanus.
Tambah Abang Johari, Sarawak enda tau enda ngiga chara kediri dikena nambahka penatai pemisi ngambika ulih melanja pemansang ti deka jampat agi dipejalaika ungkup nengeri tu.
Tambah mega kena bulan Julai taun siti nyin tadi, perintah Pakatan Harapan (PH) kala madahka bayar royalti 20 peratus ngagai nengeri deka dikira bepelasarka penguntung ari asil ke diulih di nengeri nya.
Taja pia, Abang Johari sebedau tu tegap penemu ke alai perintah nengeri enda setuju mayar royalti minyak ti dibayar ngagai nengeri tu bepelasarka 20 peratus ari penguntung beresi asil petroleum menua.
Ku iya, Sarawak minta bayar royalti patut nitihka sempekat ke disain bepelasarka pemansut minyak enggau gis.
Abang Johari mega madahka perintah nengeri ari baruh pegai Gabungan Parti Sarawak (GPS) deka majak ngenanka hak enggau autonomi nengeri ti udah lenyau.
“Kitai diatu benung ba tetengah pengawa berandau mulai hak Sarawak ke udah lenyau lalu apin lama udah kabinet perintah besai setuju deka ngaga ubah ba Pekara 1 (2) Konstitusyen Perintah Besai ngambika Sabah, Sarawak enggau Semenanjung Malaysia nyadi kaban kunsi.
“Agi mayuh pekara ti patut di tegika tang semina empat pekara ari baruh Sempekat Malaysia 1963 (MA63) tetap enda dibai kerandau enggau perintah besai,” ku iya.
Empat pekara nya baka kuasa autonomi imigresyen, hak neritka undang-undang nengeri nitihka konstitusyen perintah besai, ngintu garis entara nengeri enggau kuasa ba tanah enggau asil ari nya di dalam garis entara nengeri tu.
“Kitai enda bebatak asur. Perintah nengeri ari baruh pegai GPS netapka deka ngenan pekara tu lalu kami enda begilik penemu,” ku Abang Johari nyemetak.