Anda di sini

PBTLDM Sarawak ngelalau mayuh peranak Sarawak nyereta TLDM tauka ATM

SIBU: Gerempung Ex-Soldadu Tasik DiRaja Malaysia (PBTLDM) Pampang Sarawak ngelalau peranak Sarawak ngambi peluang ti disediaka perintah ngambi nyereta Soldadu Tasik DiRaja Malaysia (TLDM) tauka Raban Soldadu Malaysia (ATM) nyadika batang pengawa.

Chairman PBTLDM Pampang Sarawak Thomas Ling meransang peranak nengeri tu kelebih agi sida ti bebansa China ti andalka pengawa ke enchabar sereta gerai batang tubuh enggau pemutus ti manah dalam akademik ngambika ngena peluang ti tebuka nya.

“Nyereta PBTLDM ukai semina nentuka pemujur sida jemah ila, tang ulih nentuka pemanah ulah sereta nerenak runding ti mereti enggau ulih ngidupka diri kelimpah bisi peluang nemu dunya luar enggau ngulihka penemu baru dalam pengidup sida,” ku iya nerang maya aum media ba opis PBTLDM di Jalai Tuanku Osman, lemai kemari.

Nitih ku iya, tiap taun TLDM deka ngaga dua kali renggat ngambi raban nengah chara tebuka ngagai semua chalun ke ulih ba selampur Malaysia.

“Di Sarawak, pengawa ngambi raban soldadu tu diatur maya bulan Januari enggau Ogos ninting taun,” ku iya.

Thomas madahka Menteri Pertahanan Mohammad Sabu mega bisi mansutka penerang bedau lama ti udah tu ngelalau ngambika mayuh agi peranak bansa China nyereta raban soldadu.

“Raban nya mega ulih neruska pelajar ba renggat diploma enggau degree ba ‘Open university Malaysia’ (OUM) nengah skim nyali belanja ari perintah,” ku iya.

Thomas madah, pengelantang pendiau sepngudah pinchin mega terus diintu nenga pemisi Jabatan Hal Ehwal Vateran (JHEV) ATM ti nyadi sebuah ejensi ke nyediaka bantu pengelantang pendiau endang ungkup bala vateran ATM.

“SKim bantu pengelantang pendiau tu nyengkaum belanja, sekula anak raban vateran (sekula primari enggau sekula sekondari), Bantu Masuk ke Palan Pelajar Tinggi Perintah (IPTA), Bantu Kereban Penyakit enggau Bantu Penusah Ngenyit.

“Unit pinchin tu nyediaka bantu baka pinchin servis, insentif tembu servis, duit bayar pemisi belelak, duit pemati, duit sakit tachat, ‘pemulihan pencen terbitan balu’ tauka duda ti bebini baru, Elaun Tamat Perkhidmatan Mobilisasi (ETPM), bayar pulai baru peminta perubat enggau bayar ‘bencana kerja’ (Ex-Gratia).

“Nyema udah ngaul pemati, vateran, laki tauka bini enggau anak ti agi dijaga ulih nerima bantu enggau bayar ‘khairat kematian’ iya nya sepenyampau RM3,000 (vateran) lalu RM1,500 (laki tauka bini ti agi bipelanja),” ku iya nerang.

Pia mega, dikena meri latih sereta kus ngaga raban ti udah pinchin, perintah sama bisi numbuhka Perbadanan Hal Ehwal Bekas Tentera (PERHEBAT) dikena ngatur mayuh macham kus ti relevan enggau peluang gawa kemaya hari.

“Pengawa tu digaga ngambika raban soldadu ti udah pinchin bulih penemu ke ulih meri awak ngagai sida minta kereja ba sebarang kompeni ti engkeman enggau pengelandik diri empu,” ku iya.

Thomas madah, PBTLDM udah bebendar meri bantu dalam pengawa ngambi raban baru ATM, Universiti Pertahanan Nasional Malaysia (UPNM) sereta Maktab Tentera Darat ti diatur di Sarawak.

“Nya alai, kitai ngelalau bala peranak nengeri Sarawak ngambika enda ngelengkaka peluang ti bisi tu,” ku iya.