Anda di sini

Apai indai patut chakah ngaul diri dalam pelajar anak

 Lukanisman sereta bala bukai begambar ungkup kenang begulai enggau apai indai sida ti bisi datai maya Aum Besai Ninting Taun PIBG SMK Riam, bedau lama tu tadi.
UNGKUP ALBUM: Lukanisman sereta bala bukai begambar ungkup kenang begulai enggau apai indai sida ti bisi datai maya Aum Besai Ninting Taun PIBG SMK Riam, bedau lama tu tadi.

MIRI: Apai indai ti chakah ngaul diri dalam pengawa pelajar bala anak sida deka nentuka pemanah ulah sereta penyulut pemutus peresa sida, pia ku Kaban Parlimen (MP) Sibuti Lukanisman Awang Sauni maya bejadika Aum Besai Ninting Taun Gerempung Apai Indai enggau Pengajar (PIBG) Sekula Sekondari (SMK) Riam ti udah bulih sambut ke manah ari apai indai nembiak di sekula tu.

Pengerami nya sama digulu Prinsipal SMK Riam Normah Abdul Latif enggau temuai ke bukai.

Lukanisman dalam jaku pengelalu iya madahka, iya andal enggau penyereta apai indai ti chukup mayuh dalam baum nya.

“Penyereta apai indai ti chakah dalam program sekula endang patut dikena nentuka pemanah ulah anak sida.

“Terima kasih ngagai penatai apai indai lalu terus meri sukung ti manah tu,” ku iya nerang.

Lukanisman mega sama bisi nangkan apai indai ngambika serius sentang aktiviti rama anak sida.

“Kebuah pia ari baruh inisiatif Parlimen Sibuti, kitai udah numbuhka Skuad Peronda Zon 1 ti ngaul volunteer iya nya mensia mayuh dikena matau kandang endur Taman Tunku enggau Lusut maya malam hari.

“Asil ari pengawa matau nya, kitai bisi tetemuka pengawa ti enda manah ke ngaul raban nembiak ti baruh umur.

“Berindik ari bnya, kerejasama apai indai matau dikena nentuka bala anak sida enda ngaul diri enggau pengawa ke enda bepengerai tauka aktiviti ti enda meri pemaik,” ku iya.

Bejaku bekaul pemansang sekula nya, Lukanisman nyukung inisiatif sukut ‘PIDATO SMK RIAM’ dikena nnerenak ulah sereta pemerani sida bejaku ba mua bala mayuh.

Kelimpah ari nya, iya mega udah ngemendarka agih belanja sepenyampau RM10,000 ungkup PIBG SMK Riam dikena bejalaika program enggau pemansang sekula.

Ku Lukanisman nambah, iya mega mantu ngulihka geran dikena ngaga trek padang SMK Riam lalu pengawa ngaga nya nyangka deka berengkah taun tu.

Ku iya, ari baruh konstitusyen iya, bisi enam buah sekula sekondari enggau 20 buah sekula primari lalau pengawa meri agih belanja patut diberi enggau enda bechiping ngambika tetiap sekula ulih dibantu ungkup pemaik dudi hari.