Anda di sini

SPRM Sarawak deka bebendar mansik kes salah guna kuasa

Advertisement

KUCHING: Komiti Nagang Makai Suap Malaysia (SPRM) Sarawak deka fokus mansik kes salah guna kuasa ti ngaul Menteri Muda Pemansang Pengawa Dagang enggau Bedaja Datuk Mohd Naroden Majais.

Direktor SPRM Sarawak, Razim Mohd Noor madah, SPRM diatu agi mansik bekaul dua ripot ke udah diterima ba pun bulan tu.

“Kes benung dipansik lalu naka tu SPRM bisi nerima dua ripot ti bekaul.

“Endang amat kami deka mekuh ngemeratka kes tu laban iya siku ketuai, pia mega kes sensitif, kami meseti silik nentuka pengamat pekara tu,” ku iya.

Iya madah munyi nya ba aum pemberita pengudah pengawa Nyerah Nerima Tanggungpengawa entara Sapit Direktor (Penagang) SPRM Sarawak  Zulhairy Zaidel ngagai Sapit Direktor (Penagang) baru, Chang Ching ba indu opis SPRM kemari.

Tandu Razim taja pia SPRM naka tu sida bedau nganggauka Naroden ke mega Kaban Kunsil Nengeri (ADUN) Gedong ngagai opis SPRM.

“Kami deka berati dulu pansik lalu udah nyadi atur ba Tusun Pengawa Standard (SOP) iya nya deka bisi timpuh endur kami beratika keretas pansik,” ku iya.

Iya madah naka tu pansik bejalai enggau manah nadai sebarang penekul ditapi kelimpah ti kurang staf ketegal mayuh kes diterima.

Razim meri jamin pemesai iya deka bejalaika pansik endur nemu pengawa dawa ke diterima SPRM.

Sebedau tu, SPRM Sarawak ngenuku bisi nerima ripot ti madahka Naroden bisi kaul enggau pengawa makai suap sereta salah guna kuasa nyadi menteri muda.

Tu nyadi pengudah siku ex-pemberita, Joseph Tawie datai ngagai indu opis SPRM, Jalai Tun Jugah endur meri ripot pasal Naroden ke dipadah  ngembuan tanah ke mayuh ba sitak Simunjan.

Dalam ripot nya, Joseph mega madah iya dibantu luyar Dominique Ng, ke mega ex-ADUN Padungan, maya ngaga ripot nya kena 8 Feb.

Advertisement