MIRI: Kaban Parlimen (MP) Miri Dr. Michael Teo Yu Keng ngansak raban ejensi menggi tanggungpengawa ngena belanja RM1 bilion nyeleti sekula repuk ngambika lurus bejalaika pengawa nentuka belanja nya dikena memanah.
“Tetiap sekula bisi penanggul bebida ti patut diputar lalu belanja RM1 bilion tu nyangka enda chukup.
“Taja pia, enti milih sekula enggau ngemeratka sekula ti patut dirumban sereta ngena belanja nya memanah, aku pechaya tu (belanja) ulih nyerangkung mayuh agi sekula,” ku iya madah ngagai pengarang kemari.
Milih kunteriktor ti betul ku iya, pekara ti beguna mega, laban pemuntan ba pengawa tu tau ngujungka asil baka projek sekula sebedau tu ti ngasuh opis menteri bebasauka belanja.
“Kereja memanah nitihka pematut, lalu bala pengajar enggau nembiak deka teulihka pemaik ari iya,” ku iya.
Menteri Pelajar Maszlee Malik kena Hari Tiga, 20 Februari, udah ngemendarka utang penyampau RM1 bilion Perintah Sarawak enggau perintah besai deka dikena nyeleti sekula repuk ba nengeri tu.
Kemari Dr. Teo udah nyadung kupon pemakai ngagai tiga buah sekula iya nya Sekula Sekondari (SMK) Dato’ Permaisuri, Sekula Primari Bansa China (SJKC) Chung San Riam Miri enggau Sekula Primari (SK) Kuala Baram, enggau kesemua rega kupon pemakai manggai RM90,000.
Ba SK Kuala Baram, bisi 2, 100 iku penerima, SMK Dato’ Permaisuri (209 penerima) seraya SJKC Chung San Riam Miri (40 penerima), tetiap nembiak nerima kupon pemakai berega RM100 siku.
Dr. Teo nandu, iya udah ngepunka program baru lalu tuju program nya nyaup rayat naka pengulih sida.
“Mayuh nembiak datai ari ruang bilik seranta ti suntuk belanja maya ba sekula, sida ngenatka diri rapar maya jam sekula,” ku Dr. Teo.
Ku iya, bala nembiak dipilih prinsipal ari sekula tu, lalu semina sida ti tetangkupka peminta aja patut nerima kupon pemakai tu.
Dr. Teo mega madahka diri berunding nampung program tu ngagai genap sekula di Miri ngambika nadai agi nembiak deka rapar maya nurun besekula.
“Tu penanggul ti patut diperati enggau patut dibantu, nya kebuah aku deka nampung pejalai program tu dataika penggal aku gawa abis,” ku iya.