KUCHING: Opis Menteri Dagang Dalam Menua enggau Pekara Penguna (KPDNHEP) ngelalau semua orang dagang ti nyual entuka ngemeratka standard pengelikun nengah atur nitihka ‘Garis Panduan Pematuhan Pelabelan ASEAN NCAP’.
Sapit Menteri KPDNHEP Chong Chieng Jen madah penetap nya deka berengkah diterit kena 1 Mac 2019.
“NCAP sebengkah penetap pengelikun ba tetiap entuka ungkup driba enggau orang numpang enti bisi napi penusah.
‘Ngelamatu pemansut entuka, ambika chunto Volvo ngambu entuka sida likun lalu pia mega pemansut entuka ke bukai.
“Dulu agi ari tu bedau bisi penetap standard ti madahka sesebengkah entuka nya likun,’ku iya.
Chong mansutka jaku nya rambau program ngelekat label ASEAN NCAP ba palan Perodua Di Jalai Sherip Masahur ditu, kemari.
Iya nambah Institut Pemansik Pengelikun Jalai Alun(MIROS) ngeluarka penetap nya tang ke pemadu berat orang nyual entuka meseti nerenak pemereti guna NCAP ba diri sida sereta pemeli entuka.
Pekara nya ku iya udah tentu deka matak mayuh agi orang datai meli entuka ba kedai ti ngembuan label NCAP.
Tajapia, Chong nambah atur neritka penetap nya enda ulih dipejalai enggau engkeman ba taun keterubah.
“Kitai nemu diak ba tetiap polisi baru, beri timpuh ngagai orang ke bekaul enggau penetap tu nelebaka diri sida.
“Beri timpuh setaun dulu, engka ba taun 2020 ila penetap tu ulih diteritka,’ku Chong.
Ba pengawa kemari, Chong muji Perodua alai entuka bansa MyVi enggau Aruz udah bulih ASEAN NCAP.
Nengah penetap NCAP tu, orang dagang nyual entuka meseti mandangka label tu ba chermin mua enggau tisi entuka.
Label tu semina ulih dikeluar MIROS pengudah mujur dirijista ari pemendar bagi standard KPDNHEP.
Bela datai Sapit Ketuai Sekretari KPDNHEP Datuk Rostam Affendi Dato Salleh, Direktor KPDNHEP(Sarawak) Datuk Stanley Tan enggau Manager Perodua Desmond Ong.