KUCHING: Serikat sawit Malaysia majakka pengawa ngereja batang dalam kampung Mulu taja ditingkah peranak menua nya enggau pengeringat antarabansa bekaul enggau pengawa ngerusak Taba Pesaka Asal Dunya Bukit Mulu.
Nitih ku penerang berita kemari, komuniti Penan enggau Berawan madahka sida ti kereja batang udah ngerampit ngagai kandang kampung bukai sereta kereja nadai betagang sebedau raban politik nagang sida.
“Bala komuniti mega bisi meri penerang nyata enggau gambar pengawa ngereja batang ba tanah kampung din,” ku penerang ti dikeluarka Bruno Manser Fund.
Ketuai Penan, Komeok Joe madah, enti serikat enda ngetu ari ngereja batang sereta mali tanah kampung sida nyadi kebun sawit, bansa Penan deka nadai jalai beridup.
“Kami begunaka kampung endur begigaka pemakai sereta nampung chara asal kami ngidupka diri. Perintah Sarawak mesti nagang enggau ngetuka pengawa ngerusak kampung Mulu tu tekala nya. Tanah Adat Bansa Asal (NCR) kami ba kampung tu enda tau enda diaku.” ku iya nambah.
Seraya Ketuai Berawan, Willie Kajan madahka komuniti Kampung Melinau udah ngaga ripot polis ngelaban serikat ti ngereja batang ba tanah pendam Berawan enggau Tering ti beumur 300 taun dalam kampung.
Naka Hari Empat tu tadi, 16,000 iku udah nyain petisyen ari Bruno Manser Fund ti ngansak Perintah Sarawak nginsil konsesyen serikat enggau ngeluarka moratorium nukar kampung nyadi kebun sawit.
Raban sida mega ngapil ngagai Perintah Sarawak ngambika ngelala hak peranak asal Mulu sereta ngetuka pengawa ngereja batang ba kandang menua nya tekala nya.