Anda di sini

Peranak di menua pesisir patut ngaul diri dalam sektor betanam betupi moden

Advertisement
 Mathew Laing Ngau (tengah) nyuaka tepa ngagai Dennis (dua kana) seraya dikemata Geraldine Tarang, Badrol Sari sereta James Valley Harry (kanan).
TERIMA MIH: Mathew Laing Ngau (tengah) nyuaka tepa ngagai Dennis (dua kana) seraya dikemata Geraldine Tarang, Badrol Sari sereta James Valley Harry (kanan).

MARUDI: Peranak di Baram sekalika sida ke diatu tauka rebak baru jemah ila patut ngerunding ngaul diri dalam pengawa betanam betupi moden ti dikelakuka perintah nengeri Sarawak ke ulih nyadi pun penatai ekonomi.

“Kitai peranak di menua pesisir seruran madahka diri bisi ngembuan tanah ti besai ba kandang endur ngelingi rumah panjai tang enda dikena enggau memanah nya ti ngasuh tebasau.

“Bisi mega kolej sereta universiti menua kitai tu ti ngajar kus bekaul betanam betupi dikena meri penemu ngagai bala nembiak ngambi ngangkatka penatai pemisi dalam pengawa betanam betupi moden kelimpah ari siti chara dikena netuka sida bisi pengawa ti teguh,” ku Kaban Kunsil Nengeri (ADUN) Telang Usan Dennis Ngau lebuh ti bejadi pekit Majlis Sukan Sekolah Rendah (MSSR) Pelilih Baram ke-36 2019 ba Stadium Mini Marudi kemari.

Ku Dennis nambah, Kepala Menteri Datuk Amar Abang Johari Tun Openg endang bebendar mekuh sereta komited deka ngemansangka kandang menua pesisir Sarawak nyengkaum Ulu Baram. Kelebih agi sitak ari baruh pegai Ejensi Pemansang Tanah Tinggi (HDA) iya nya Telang Usan enggau Mulu.

Berindik ari nya, kitai ngarapka Baram deka dikemansang enggau insfrastruktur sereta perengkaguna ti manah agi,” ku Dennis madah.

Nengah pemansang insfrastruktur ba Baram, tu deka mantu nyediaka pemisi ti manah agi. Pia mega iya nangkan ngambika enda semina ngarapka perengkaguna pemun nya tembu laban nengah pengeransing aktiviti di sebuah kandang menua mega ulih mantu nyungkak pemansang infrastruktur.

BA kenang ke bukai, Karnival Lumba enggau Main MSSR Pelilih Baram dibagi ngagai lima zon ti nyengkaum Zon Baram Tengah, Zon Ulu Baram, Zon TutohApoh, Tinjar enggau Zon Ili Baramti udah ngaul 528 iku atlit lalu diulu 268 iku pengajar sereta staff sukung. Pengerami nya mega dibagi ngagai akademik, lumba enggau main ti diatur tiga hari berunggu di Marudi.

Ba pengerami nya, Dennis udah ngemendar geran ari baruh Projek Mit Menua Pesisir (MRP) sepenyampau RM20,000 ungkup Lumba enggau Main MSSR Pelilih Baram.

Kelimpah ari nya, Dennis ti bejaku ngarika semua pengari rayat Baram baka iya empu, Dato Gerawat Gala, Datu Dr Penguang enggau Kaban Parlimen (MP) Anyi Ngau madahka asai temegah ati sereta terima kasih sida ngagai semua staf Opis Pelajar Baram, semua pengajar sekula enggau staf sukung ba pengawa sida ti enda leju meri komitmen dalam mantu semua nembiak sekula di Baram ti udah ngelimpangka awak sida sereta bisi ti ngena dulu duit kediri dikena mantu sekula enggau nembiak.

Entara ti bisi datai iya nya Pemesai Opis Pelajar Baram ke baru Mathew Laing Ngau, Pemesai Opis Pelilih Baram James Valley sereta semua kepala pengajar kelelima zon nya.

Advertisement