MIRI: Lima buah sekula repuk ari kandang menua Kunsil Nengeri (DUN) Lambir entara sekula ti begunaka bantu enggau lengkas ngambika diseruri.
Kaban Kunsil Nengeri (ADUN) Lambir Ripin Lamat madah, entara sekula ti dipadahka iya nya Sekula Primari (SK) Kampung Subak, SK Keluru Tengah Bekenu, SK Ulu Satap, SK Peninjau enggau SK Tawakal.
“Kitai ngarapka bisi agih belanja RM100 juta ari perintah besai dikena nyeruri 33 buah sekula repuk di Sarawak ti mega bisi ngaul lima buah sekula di kandang menua kitai,” ku iya kemari.
Ripin madahka, kelelima sekula nya entara ti paling kritikal lalu begunaka agih belanja enggau lengkas ngambika ulih diseruri.
“Lis lima buah sekula tu udah disuaka ngagai Opis Pelajar Nengeri sebedau tu lalu ngarapka nya diberi pemerat sama baka sekula repuk ke bukai,” ku iya nerang.
Dulu agi ari nya, Ripin udah nyuaka pemeri ari Lembaga Amanah Kebajikan Islam Bakam (LAKIB) ngagai 13 iku nembiak sekula SK Bakam ti mega anak patu balu.
Ba kenang ti sama mega Ripin udah nyuaka replika chek dikena meli sistem meri kuasa karan tauka genset ungkup dikena ngatur sida ti udah nadai di Masjid Khairat Kampung Bakam.
Nya asil ari bantu LAKIB dikena ngemuntangka raban masjid dalam pengawa ngatur enggau numbakka bangkai sida ti udah nadai muakka malam.