KUCHING: Gerempung Deriba Teksi dilalau begempung enggau Grab dikena mutarka penanggul besai ke ditapi sida diatu.
Menteri Dagang Temuai, Seni, Main Asal, Nembiak Lumba enggau Main Datuk Abdul Karim Rahman Hamzah madah, raban deriba teksi enda patut mutarka penanggul kediri aja, sida patut begempung enggau Grab ke pemaik kededua piak.
“Enti enda pia, manah agi sida teksi ngerejista diri enggau Grab laban ke ditemu aku nyadi deriba teksi mayuh pekara patut dibayar nyengkaum insurans tang nyadi deriba Grab nadai.
“Taja pia, aku pechaya perintah besai tentu benung beratika pekara tu. Dikearap perintah ulih numbuhka Skim Insurans Khas ungkup bala deriba grab ngambika bala penumpang sida bisi bungkur insuran,” ku iya.
Iya madah munyi nya ngagai pengarang berita maya ngenang randau enggau raban deriba teksi sebedau ngelancharka Stiker Kerita Kimpin Nemuai Ke Sarawak ba Penyangkai Teksi, Plaza Merdeka ditu, kemari.
Nangkan nya, Karim madah beserimbai enggau Kimpin Nemuai Ke Sarawak, dia Opis Menteri iya nengah Kaunsil Dagang Temuai Sarawak deka nyadung stiker kerita ungkup bala deriba teksi di bagi menua Sibu, Miri, Bintulu enggau ke bukai.
“Tuju pengawa nyadung enggau ngelekatka stiker tu dikena ngelakuka industri dagang temuai di Sarawak sereta meransang bala temuai baikka nya ari menua luar tauka dalam nengeri raun ditu.
“Tu sebengkah ari inisiatif kami (perintah) dikena ngelakuka Sarawak kelimpah nengah kain rentang, skrin LED enggau ke bukai.
“Arapka raban deriba teksi terus nyaup ngelaku enggau ngangkatka nama Sarawak ba bala temuai ke nemuai ngagai Sarawak,” ku iya.
Sama bisi datai Direktor Kaunsil STB Haji Ibrahim Nordin, Ketuai Pemesai Eksekutif Sharzede Datu Haji Salleh Askor, Chairman Kaunsil Dagang Temuai Sarawak Datuk Haji Abdul Wahab Aziz enggau ke bukai.