Anda di sini

Terima pemansang, ubah runding ngambika maju: Dennis

Advertisement
 Penatai Dr Rundi (mua) enggau Dennis (kiba iya) dilalu peranak Long Nakan lebuh seduai ngulu pengawa bejadi nyerahka projek SARES.
BASA TEMUAI: Penatai Dr Rundi (mua) enggau Dennis (kiba iya) dilalu peranak Long Nakan lebuh seduai ngulu pengawa bejadi nyerahka projek SARES.

LONG NAKAN, Telang Usan: Tiga buah rumah panjai Kayan dalam sitak tu deka dikemansang nyadi raban mit ba pekara betanam betupi moden, dagang temuai enggau infrastruktur pemun.

Rumah panjai tu iya nya Long Nakan, Long Keseh enggau Long Pilah, pia ku Kaban Kunsil Nengeri (ADUN) Telang Usan Dennis Ngau.

“Randau deka diatur antara bala ketuai enggau komuniti ari Long Nakan, Long Keseh enggau Long Pilah ngambi beratika langgur penemu sentang tiga buah rumah panjai tu ti deka dikemansang nyadi raban mit ba pekara betanam betupi moden, dagang temuai enggau infrastruktur pemun.

“Tiga buah rumah panjai tu besemak enggau dandang tanah ti engkeman endur betanam betupi moden, nupi ikan enggau pemanah rampa menua ti engkeman dikemansang dikena matak penatai bala temuai ti ngasuh iya mansang nyadi menua pesisir ti moden.  

“Aku deka ngetuaika randau tu enda lama agi,” ku Dennis lebuh bejaku ba pengawa nyerahka projek Skim Bekal Kuasa Karan Alternatif Menua Pesisir Sarawak (SARES) ngagai 11 buah rumah panjai ba Telang Usan ditu apin lama ke udah. Pengawa udah dipenyadi Menteri Bekal Ai enggau Elekterik Menua Pesisir Dato Sri Dr Stephen Rundi.

“Tambah mega, tu kebuah aku milih Long Nakan ungkup atur pengawa sehari tu, nyadi sebagi ari pengawa kitai ngelakuka kandang menua tu, kelebih agi Long Nakan nyadi palan dagang temuai.

“Nyadi orang ti bisi penemu ba dagang hotel, aku andal amat Long Nakan bisi pengulih enggau ulih matak sida ti deka ngelarika diri ari idup ba mengeri, endur sida belepa enggau ngelantangka ati meda rampa menua asal,” ku Dennis, seraya nambah, mayuh rumah panjai bukai tauka palan bukai serap menua Telang Usan ngembuan pengulih tu.

Taja pia, bisi pengawa patut digaga dulu agi nyendiaka infrastruktur pemun.

“Pengudah infrastruktur baka jalai alun enggau arus penyambung disedia ditu, jalai pengangkut antara tiga buah rumah panjai deka muntang agi. Tu deka matak peranak rumah panjai mulaika diri ke menua lalu berimba mayuh agi tanah ungkup betanam betupi moden ari nempa pekara ti meransang ekonomi ngerembai ari meri sida peluang idup ti menyana agi ba menua Telang Usan.”

Taja pia ku Dennis, langgur penemu nya deka ngemai pemaik enti peranak menua nya sedia nerima iya lalu deka nyadi sebagi ari pemansang.

“Nadai pekara deka nyadi enti peranak menua tu enggai nerima tang semina nganti perintah bejalaika iya, tauka balat agi enti nagang tauka nekul agenda pemansang ti diperambu perintah nengeri ketegal penemu dipansutka bala penyakal.

“Kitai udah meda enggau ngasaika pekara tu ba Telang Usan,” ku iya nambah.

Ngelansa pasal randau nya, Dennis pechaya pekara tu deka mujur ari penumbuh Ejensi Pemansang Tanah Tinggi (HDA), penemu ditengkebang Kepala Menteri Datuk Patinggi Abang Johari Tun Openg lalu diketuaika Sapit Kepala Menteri Datuk Amar Douglas Uggah Embas.

Ku Dennis, kenyau ari HDA ditumbuh, beberapa projek udah dipejalai ba Telang Usan baka projek nupi kelulut, program ngidupka baru rian sereta mega nanam nanas ngaul beratus iku penyereta ari mayuh bengkah rumah panjai.

Advertisement