KUCHING: Penatai pemisi nengeri Sarawak dipelaba deka majak ngerembai asil ari empas pemansang industri digital jemah ila.
Kepala Menteri Datuk Patinggi Abang Johari Tun Openg madah, tu mandangka kelemayang ti positif asil ari sekeda inisiatif digital kenyau ari taun 2018.
“Ba taun 2018, asil empas pemeranak puku dalam industri bekaul digital, dia kitai nyaup ngasilka Pemansut Dalam Nengeri (KDNK) dua nyentuk tiga peratus.
“Tu ngujungka kitai nerima baru lebih (RM) 3 bilion lalu tu baru pemungkal iya,” ku iya rambau bejadika Simposium TVET 2019 sentang Ngemansangka Penau ba Ekonomi Digital ti diatur PPKS bepalan ba sebuah hotel tebilang ditu, kemari.
Abang Johari mega madah, nya baru pemungkal lalu nyadi inisitif keterubah pengudah iya dipadu ngiring nengeri tu.
Ku iya, nengah inisiatif tu mega Sarawak ngembuan kluster kediri dikena ngaduka transformasyen ekonomi nengeri.
“Aku andal nyema semua infrastruktur digaga, dia kitai ulih ngemujurka transformasyen ekonomi nengah pekara digital tu,” ku iya.
Nangkan nya, ku Abang Johari iya deka terus ngemanah agi infrastruktur baka baka tiang komunikasyen ba selampur nengeri Sarawak ngena agih belanja RM1 bilion ke udah diagih taun nyin kemari.
Tandu iya baru, pengawa tu deka terus dipejalai ba bulan baru lalu iya empu deka ngelawa Bagi Menua Betong beratika asil pansik ngaga tiang komunikasyen ba kandang endur ke udah dipilih.
Sama bisi datai Menteri Pelajar, Sains enggau Pansik Teknologi (MESTR), Datuk Sri Micheal Manyin Jawong, Menteri Utiliti Datuk Sri Stephen Rundi Utom, Menteri Dagang Temuai, Seni, Main Asal Nembiak enggau Lumba Datuk Abdul Karim Rahman Hamzah, Sekretari Perintah Nengeri Tan Sri Datuk Amar Mohammad Morshidi Abdul Ghani, Sekretari Mendam MESTR Datu William Patrick Nyigor, Direktor Eksekutif PPKS Hallamn Sabri, Chairman PPKS, Tan Sri Datuk Amar (Dr) Haji Abdul Aziz Husain enggau ke bukai.