KUCHING: Palan Pemansang Pengelandik Sarawak (PPKS) seruran bekerejasama enggau raban ti bekaul nyaup perintah nengeri ngerembaika transformasyen Latih Pelajar Teknikal enggau Vokasional (TVET) di Sarawak.
Chairman PPKS, Tan Sri Datuk Amar (Dr) Haji Abdul Aziz Husain madah, sida nyadi siti ari tim pengereja pengawa ke seruran nyikap diri ke pemaik rayat enggau menua.
“Kitai bela nemu Kepala Menteri (Datuk Patinggi Abang Johari Tun Openg) chukup beratka pemesai guna Ekonomi Digital nyadi pengemudi besai ba tranformasyen ekonomi.
“Ekonomi Digital enggau Industri 4.0 siti jeman baru ke chukup manah, mai chura baru mandangka penau rayat di menua tu.
“Nya alai, PPKS ngasaika teknologi baru tu ulih meransang runding ti kreatif ngasilka sesebengkah produk enggau servis baru,” ku iya.
Iya madah munyi nya rambau pengawa bejadika Simposium TVET 2019 sentang Ngemansangka Penau ba Ekonomi Digital bepalan ba sebuah hotel tebilang ditu, kemari.
Nangkan nya, Aziz madah PPKS naka ulih mantu nempa nembiak rebak baru nyadi rayat di bepenemu seriris enggau juluk pemansang kemaya hari.
“Kenyau ditumbuh ari taun 1994, PPKS sigi nyendiaka pelajar teknikal enggau vokasional iya nya seriris enggau guna ba makit kereja.
Dalam nyapai juluk perintah ba pemansang ekonomi digital enggau industri 4.0 di Sarawak, Aziz madah PPKS bisi nyendiaka sekeda kus pelajar nyengkaum ‘Big Data, Cloud Computing, Cyber Security, Pekara-pekara Internet (IoT) enggau Vertical Integration’.
“Dikena ngemujurka juluk perintah tu mega, PPKS betukar sempekat pemeri ati (MoU) enggau Institut Bendigo Kangan, Melbourne, Australia. Tu dikena ngerandang jalai inisitif strategik begulai ba sentang latih pelajar enggau projek pansik ke pemaik kededua piak.
“Nengah tu, kami deka begulai ngatur aktiviti nyengkaum seminar, penemuai pengereja landik, program betukar staf,” ku iya.
Berebak enggau nya, iya madah enda lama agi PPKS merambu deka numbuhka sebuah Kolej Pemansang Latih Automotif (AATC).
Bisi 23 iku pengelicha ari Malaysia enggau menua luar ngambi bagi ba Simposium TVET 2019 ke berengkah kemari (19 Feb) nyentuk 21 Feburari tu.
Sama bisi datai Kepala Menteri Datuk Patinggi Abang Johari Tun Openg, Menteri Pelajar, Sains enggau Pansik Teknologi (MESTR), Datuk Sri Micheal Manyin Jawong, Menteri Utiliti Datuk Sri Stephen Rundi Utom, Menteri Dagang Temuai, Seni, Main Asal Nembiak enggau Lumba Datuk Abdul Karim Rahman Hamzah, Sekretari Perintah Nengeri Tan Sri Datuk Amar Mohammad Morshidi Abdul Ghani, Sekretari Mendam MESTR Datu William Patrick Nyigor, Direktor Eksekutif PPKS Hallamn Sabri enggau ke bukai.