SIBU: Kerejasama ke manah antara sekula enggau Pemesai Gawaka Kaul Sekula (PPS) nyadi chara ke engkeman nempa sekula likun ari pengawa enda manah.
Prinsipal Sekula Sekondari (SMK) Bawang Assan, Abdul Rahman Abdullah madah, nengah PPS ti dikeringka raban polis, ulah bala nembiak sekula deka diperatika.
“PPS megai tanggungpengawa nyaup nempa sekula likun nyengkaum ngumpul penerang sekula nyema bisi penyalah dikereja lalu dibai ngagai Opis Menteri Pelajar (KPM) tauka polis empu.
“Pengawa sida mega bejalai matau sereta nemuai ngagai sekula kelimpah ngenataika licha bekaul enggau pengelikun ngagai bala nembiak enggau pengajar,” pia ku iya madah.
Iya mantaika jaku nya maya Majlis Program Jom Ke Sekolah Peringkat Kebangsaan 2019 di sekula, ensana.
Abdul Rahman mega madah, progam nya ditumbuhka dikena nangam kaul sereta kerejasama ke manah agi antara sekula enggau PPS.
Kelimpah ari nya ku iya, program nya engkeman matau ulah nembiak ari ke ngereja pengawa enda manah ti ningkah undang-undang baikka dalam kandang sekula tauka ba luar.
“Seraya nya kitai deka meda bala nembiak sekula ditu semampai nyaga ulah diri nyengkaum enda ngaul pengawa enda manah ba luar sekula,” ku iya madah baru.
Sama bela datai maya tu iya nya PPS sekula, ASP Sylvarius Gopog ti macha jaku ari Kepala Polis Menua Tan Sri Mohamad Fuzi Harun.
Teks jaku nya bisi ngundan pekara bekaul enggau disiplin sereta chara mutarka ulah ngereja pengawa enda manah.