MARUDI: Lebih ari 500 pengempu tanah Adat Bansa Asal (NCR) sitak Marudi enggau Mulu udah ngulu Randau Tanah NCR enggau Gaya Politik ba Palan Sivik Baram ditu, Hari Enam tu tadi.
Randau tu diatur kaban Komiti Pemansang Poyut/Lubok Nibong lalu udah dipenyadi Sapit Speaker DUN, Dato Gerawat Gala.
Licha udah dikenataika Menteri Muda Kaunsil Kandang Menua, Datu Dr.Penguang Manggil enggau Gerawat empu.
Gerawat ti mega Kaban Kunsil Nengeri (ADUN) Mulu, lebuh mantaika batang jurai diri, iya empu nyengkaum Datu Penguang enggau Kepala Menteri sereta empat bala bukai udah dipadu kabinet nyadi komiti ti matau isu tanah NCR ba sitak menua dipegai sida.
Sida udah dipadu gawa kenyau ari bulan Julai taun nyin tadi lalu pangku pengawa tu nyengkaum nyaga Pemakai Menoa enggau Pulau Galau (PMPG), ku iya.
Pengudah nya Datu Penguang nerang ba mua peranak dia ngena Jaku Iban, ke alai PMPG tu tanah NCR, endur ngasu enggau pengawa bukai ti beguna ngagai komuniti ba kandang menua disebut.
Bisi mega dipejurai pasal NTB tauka di baruh Seksyen 18 enggau Sempekat Malaysia 1963 (MA63) ti dibantaika Datu Gerawat, iya nya sebedau Malaysia ditumbuhka Sabah, Sarawak enggau Semenanjung Malaysia.
Sama bisi datai Pemesai Pelilih Marudi Mackos Sibong, Chairman Kaunsil Pelilih Marudi (MDC) Kaunsilor Edward Mendai, dua Sekretari Politik Kepala Menteri Alexander Asing enggau Robert Ayu sereta bala ketuai komuniti bukai.
Bala penyereta meretika pekara nya dalam agi pengudah nerima penerang ari Datu Penguang lalu enda begunaka timbal ari raban bukai enti sida enda kiruh gawaka rayat sentang pengawa mutarka isu tanah.