Anda di sini

Bisi ubah mimit ba pekit Safari Rakit Baleh-Kapit 2019, ku Galong

Advertisement
 Galong Luang (lima kanan), Belayong Piok (enam kiba) begambar ungkup kenang pengudah tembu baum begulai enggau tim teknikal enggau tim akim seraya Favian Masing (empat kiba) enggau Kasau Kasa (lima kiba).
MUTUSKA PENEMU: Galong Luang (lima kanan), Belayong Piok (enam kiba) begambar ungkup kenang pengudah tembu baum begulai enggau tim teknikal enggau tim akim seraya Favian Masing (empat kiba) enggau Kasau Kasa (lima kiba).

KAPIT: Safari Rakit Baleh-Kapit 2019 bisi bida mimit kelebih agi ngaul pemesai enggau gaya langkar rakit sereta penyampau tubuh penyereta ngambi bagi ba pekit antarabansa ninting taun nya.

Mansutka pekara tu, Sapit Residen Galong Luang lebuh ngetuaika aum komiti begulai enggau tim teknikal ti betuaika Kasau Anak Kasa ari Opis Tanah enggau Survey (JTS) enggau tim akim betuaika Favian Masing Lintang ari Kaunsil Pelilih Kapit.

Aum udah diatur ba bilik konferen Opis Residen, Kompleks Opis Nengeri lalu udah digulu bala kaban komiti pengatur enggau sekretariat.

Aum tu ku iya udah bejuraika langkar baru rakit enggau ngurangka penyampau tubuh penyereta dalam siti tim.

“Sebedau tu pemesai rakit enda kurang ari enam kaki pemesai enggau enda kurang ari 24 kaki pemanjai lalu rakit digaga 100 peratus ari buluh. Taja pia, taun tu bala komiti udah mutus ngaga ubah mimit ba pemesai rakit ngagai empat kaki pemesai enggau enda kurang ari 25 kaki pemanjai. Tambah mega, rakit ulih digaga ari 100 peratus buluh tauka begulaika buluh enggau lumpung kayu. Enti rakit nya digaga ari buluh enggau lumpung kayu, penyampau lumpung kayu enda lebih ari empat batang,” ku Galong madah nyemetak.

Kebuah ubah tu digaga laban buluh mar digiga. Udah 23 taun ngatur pekit berakit naka diatu lalu taun tu datai ba renggat ke-24, tu ngujungka buluh ti tumbuh ba tebing ai Baleh enggau pati sungai baka Sungai Mujong enggau pati iya, Sungai Merirai, Sungai Kain enggau Sungai Gaat majak kurang,” ku Galong.

Ku iya, bala komiti mega udah sepenemu ngurangka penyampau tubuh penyereta ari sebedau tu antara enam ngagai lapan iku dalam siti tim ngagai antara empat ngagai enam penyereta dalam siti tim.

“Tu dikena meransang mayuh agi penyereta ari ejensi perintah, gempung ukai dikuasa perintah (NGO), kelab enggau serakup menua tu sereta Komiti Pemansang enggau Pengelikun Genturung Pendiau (JKKK) seraya ngelimat belanja ngatur pengawa ungkup tetiap tim,” ku Galong.

Taun tu Safari Rakit Baleh Kapit meleka ari Rumah Lugat, Nanga Semawang, Sungai Majau Baleh kena 6 April lalu ba hari kedua (7 April), meleka ari Rumah Ekau, Nanga Mujong, Batang Baleh napatka Palan Penyangkai Ekspres Kapit.

Pejalai belumba ari Rumah Lugat di Nanga Semawang, Sungai Majau ngelawa Pasar Kapit nepan perau panjai urung 3-4 jam pengelama mansa Sungai Majau, Sungai Mujong, Batang Baleh lalu nengah Batang Rajang. Penyauh ari Rumah Lugat ngagai Pasar Kapit urung 57.3 km.

Rumah Lugat bisi 21 pintu bilik seraya Rumah Ekau urung 28km penyauh ari Pasar Kapit bisi 15 pintu bilik. Pejalai ari Rumah Ekau ngelawa Pasar Kapit urung sejam setengah pejalai ngena perau panjai.

Pekit berakit nyadi program dagang temuai besai di Kapit ti diatur ninting taun ngili Batang Baleh lalu mudik Batang Rajang napatka Palan Penyangkai Orang Tambang Kapit ti mega nyadi adan pekit.  

Pekit diatur Opis Residen Kapit bekerejasama enggau Kaunsil Dagang Temuai Sarawak, Opis Menteri Dagang Temuai, Seni, Main Asal, Nembiak enggau Lumba sereta mayuh bengkah ejensi perintah di Bagi Menua Kapit

Aktiviti bukai dirintai nyerumba Safari Rakit taun tu nyengkaum pekit lumba bot laju ti ngaul mayuh bengkah kategori sereta pekit bekayuh.

Advertisement