Anda di sini

Program NIE ditampung ke pemaik nembiak enggau sekula, ku Julaihi

 Julaihi (dua kanan) disempulang Azhar (kanan) begambar ungkup kenang begulai enggau bala temuai dipebasa sereta bala pengajar ba Sebuyau.
PERANSANG PELAJAR: Julaihi (dua kanan) disempulang Azhar (kanan) begambar ungkup kenang begulai enggau bala temuai dipebasa sereta bala pengajar ba Sebuyau.

KUCHING: Menteri Muda Jalai Tebing Tasik, Datuk Julaihi Narawi madah raban sida deka nampung pejalai Program Suratberita dalam Pelajar (NIE) ungkup sekula ba sitak Sebuyau.

Ku iya, program tu beguna amat dikena ngangkatka standard Jaku English ngagai bala nembiak sekula lalu enda nejuka Jaku Melayu.

Agih belanja besai dikena bejalaika program tu nadai nanggul laban iya meri pemaik ngagai bala nembiak ba sekula.

Di baruh program NIE, 19 buah sekula primari enggau sebuah sekula sekondari ba Sebuyau nerima selambar surat berita The Borneo Post ninting hari.

Ku Julaihi, iya udah ngagihka lebih ari RM100,000 setaun ungkup program tu, ti diatu udah manggai empat taun.

“Kelimpah subjek Matematik enggau Sains, Jaku English mega nyadi siti subjek chukup mar dipelajar, nya kebuah program NIE patut ditampung dikena mantu bala nembiak ba sekula ngambika ulih ngemanahka agi pengawa nguasa jaku nya,” ku iya ti mega Kabna Kunsil Nengeri (ADUN) Sebuyau ba Pengawa Nutup Seminar Pelajar 2019 bepalan ba Balai Pemansang Sebuyau.

Lebih ari 40 pengajar nyengkaum kepala pengajar enggau Prinsipal Sekula Sekondari (SMK) Sebuyau, Hasbi Ancheh ngulu program nya.

Julaihi mega muji bala pengajar laban udah ngena memanah program NIE ungkup tuju bukai baka nyadika kereban dibacha bala nembiak ngambika sida gaya pekara ti nyadi kemaya hari ba nengeri tu.

Iya mega dekaka bala pengajar ngatur mayuh agi seminar ba pengawa bekunsika mayuh agi penerang bekaul enggau pelajar ngagai bala nembiak.

Berebak enggau nya, RM10,000 udah diagih ngagai semua raban Serakup Apai Indai enggau Pengajar (PIBG) ari tetiap sekula ba sitak Sebuyau dikena ngatur mayuh agi program pelajar.

Sama datai Direktor Pelajar Nengeri, Azhar Ahmad.