Anda di sini

Olimpik Tokyo 2020: Welson Sim antara nama dikirai Sarawak bepekit tikas dunya

SNOWDAN
SNOWDAN

KUCHING: Welson Sim bisi pengulih nyadi siku atlit nyemerai diadaka Sarawak bepekit ba lumba akuatik olimpik.

Menteri Muda Nembiak enggau Lumba Datuk Snowdan Lawan (gambar) madah, Sim ulih nyadi atlit olimpik enti nerima penerang ti chukup, semampai dilatih sereta bisi disiplin tinggi.

“Ari penerang ti chukup, seruran nerima latih enggau disiplin diri ti tinggi, Welson Sim ulih nyadi siku agi atlit diadaka Sarawak bepekit ba lumba akuatik olimpik,” ku iya.

Iya mansutka jaku nya ngelansa pasal pemujur Sim teulihka midul emas ba lumba nyemerai gaya ngatika diri 400 meteri lelaki ba Lumba Nyemerai Tebuka Victoria, Melbourne, Australia, Hari Lima tu tadi.

Snowdan madah, pemujur dijapai Sim chukup besai lalu Sarawak temegah sereta lantang meda pemujur ngalahka champian lumba, Mack Horton enggau rikot jam 3.54.77.

“Tu nunjukka Sarawak nadai kala suntuk sida ti bepenau enti dikemansang enggau meruan.

“Ba sebanag lumba, enti fokus dituju kia aja, tu suah agi mansutka asil enggau pemujur.

“Sim mujur nurai pemujur tikas dunya, nyadi atlit ti agi biak, peragam besai amat iya deka nyadi atlit olimpik kitai udah tu,” ku iya.

Snowdan madahka Lumba SEA di Filipina deka dikena berati, lumba dipelaba disereta Sim lalu Olimpik Tokyo 2020 tentu deka ditapat udah nya.

Ku iya, pemujur sim nyadi testimoni ke amat ke alai sebarang atlit enti diberi awak, jam enggau latih ti chukup tau mujur dalam lumba.

Tu nipakka juluk Sarawak keran deka nurai pemujur dalam lumba sereta nyadi kuasa lumba.

“Pemujur Sim nyikap pemujur bala atlit Sarawak sebedau tu baka Tania Bugo (nyemerai), Watson Nyambek, Azlan Iskandar (squash), Pandalela Rinong (terejun) enggau Buda Achah (gumpal isi). Semua tu ngasuh Sarawak temegah.

“Nuju semua atlit Sarawak, mesti ingat, pekara ti dikereja kita, panggau pemujur dipenggi kita empu. Sarawak lantang ati sereta temegah ari pemujur kitai,” ku iya.