MUKAH: Ketuai Raban Bansa enggau Ketuai Genturung pendiau (KMKK) patut gawa dalam siti tim begulai enggau pengari rayat sereta opis pelilih ba sitak sida empu.
Kaban Kunsil Nengeri (ADUN) Daro Safiee Ahmad madah, tu dikena ngulihka asil enggau pangka pemadu manah.
“Asil pemanah kaul entara KMKK enggau pengari rayat sereta opis pelilih deka nyata dipeda ba pangka iya ngagai komuniti,” ku iya lebuh bejaku nyerumba Pengawa Nyirika Baru enggau Baru Dichiri KMKK ungkup Pelilih Daro apin lama ke udah.
Raban KMKK mega ku Syafiee, patut meri langgur penemu sida ti mangka pemutus kepenudi raban atas.
Kebuah pia, sida tu raban pemadu mereti enggau ngembuan kaul rat ba renggat baruh sereta komuniti ba menua nya.
Berebak enggau nya, sida mega dipinta bejalaika pangku pengawa enggau integriti sereta panjai runding maya sida gawa.
Kelebih agi ba pengawa perintah ngemansangka nengeri tu ungkup timpuh panjai.
“Patut nemu arus pemansang kemaya hari lalu ukai semina berundingka renggat pemun aja,” ku iya.
Berebak enggau nya, pengelurus bejalaika pangku pengawa nyadi KMKK patut dikuan ba ati sida nadai ngira jam.
Tu nyengkaum anang ibuhka peragam negatif ti disebut sekeda raban pasal pangku pengawa dipejalaika sida.