Anda di sini

Penyerakup nyadi pelasar ti engkeman dalam pemansang

Advertisement
 Penatai Abang Johari disambut komuniti China Hakka.
SERURAN NGEMERANKA PENYERAKUP: Penatai Abang Johari disambut komuniti China Hakka.

KUCHING: Kepala Menteri Datuk Patinggi Abang Johari Tun Openg pechaya penyerakup nyadi pelasar ti pemadu manah dikena mai pemansang ti meruan ungkup nengeri tu ti endang kaya enggau adat sereta main asal rayat pupu bansa.

Beserimbai enggau nya, iya ngansak rayat di nengeri tu ngambika ngetan penyerakup ti endang udah bisi tu enggau nyaga kaul sereta ulah ti bebasaka sama diri ti endang udah bisi kenyau ari suba.

“Kitai endang udah ngelala sama diri, tu mih pekara ti pemadu dikemerat dalam Sarawak.

“Pia mega, niang (Pehin Sri) Adenan Satem kala madah iya nya komuniti China ditu ukai nya ‘orang datai’, sida mega baka rayat Sarawak ke bukai ti udah lama diau ditu kenyau ari suba.

“Nama ti ku niang Adenan iya nya ditu kitai di Sarawak udah lama idup begulai enggau lantang. Sarawak nyadi model penyerakup, baka Taun Baru China ti dirami kitai tu begulai enggau pangan diri,” ku iya.

Iya madah munyi nya lebuh ti bejaku ba pengerami makai lemai Gempung Gerempung Hakka Sarawak 2019 ba Balai Sekula Primari China (C) Chung hua No. 3, Jalai Padungan ditu malam kemari.

Pengerami nya diatur begulai lima gerempung Hakka iya nya Gerempung Hakka Sarawak, Gerempung Komuniti Taipoo Kuching, Gerempung Hopoh Sarawak, Gerempung Komuniti Kaying Kuching enggau Gerempung Fui Tung Onn Kuching.

Abang Johari madah, kerejasama nya ngayanka penyerakup entara gerempung enggau komuniti nya.

“Hakka begulai lalu komuniti bukai di Sarawak mega sama begulai, lalu tu ulih negutka penyerakup rayat Sarawak,” ku iya nambah.

Chairman Gabungan Parti Sarawak (GPS) nya madah, perintah nengeri mega sama bisi nyediaka subsidi penerebai ungkup peranak Sarawak ti belajar ba palan pelajar tinggi di Semenanjung, Labuan enggau Sabah dikena sida pulai ngintu pengerami begulai enggau sida sebilik ditu.

Ku iya nerang, nengah kawin champur ti mayuh digaga ba nengeri tu, nadai nyadi penanggul ungkup peranak Sarawak pulai ke nengeri tu ngena subsidi nya dikena ngintu dua pengerami dalam timpuh setaun.

“Nyema ruang bilik kita champur China enggau Iban, kita ulih nerima subsidi RM300 diena pulai ngintu pengerami Taun Baru China lalu RM300 agi dikena pulai ngintu Hari Gawai Dayak,” ku iya nambah.

Advertisement