Anda di sini

Kerejasama rat semua raban mutarka penanggul sekula

 Wissly (tiga kanan) maya betuaika AGM PIBG SMK Luar Bandar No 1 Sibu, ensana.
BAUM: Wissly (tiga kanan) maya betuaika AGM PIBG SMK Luar Bandar No 1 Sibu, ensana.

SIBU: Bala apai indai, pengajar enggau tuai raban bansa patut bekerejasama ngemunaska penyalah bejamah antara nembiak di sekula.

Penemu tu dibantai Chairman Gerempung Apai Indai enggau Pengajar (PIBG) Sekolah Menengah Kebangsaan (SMK) Luar Bandar No 1 Sibu Wissly Amis Nyalu maya aum besai PIBG sekula nya, ensana.

“Mayuh kebuah nembiak enggai nurun ke sekula nyengkaum ketegal dijamah pangan diri.

“Nya alai, kaul tauka kerejasama apai indai, pengajar enggau tuai raban bansa beguna bendar ngemunaska penyalah baka tu seraya kitai nyaup ngemansangka pelajar sida,” pia ku iya madah.

Wissly mega madah, nengah program baka Program Ziarah Cakna ti dipenyadi Opis Menteri Pelajar Malaysia (KPM) Januari tadi dikeandal ulih nyaup nembiak rindu nurun ke sekula baru.

“Program baka tu diatur laban tau bendar ngembing bala nembiak enda puntan nembuka sekula sida,” ku iya madah baru.

Ba aum ti digulu 425 iku apai indai enggau pengajar nya, Wissly agi dipadu megai pengawa Chairman PIBG 2018/2022 sekula nya.

Mandal iya iya nya Mathias Kemarau Jua kelimpah komiti bukai datai ari bala apai indai enggau pengajar sekula.

Nengah komiti baru nya, Wissly andal amat gerempung sida mujur mantu ngemansangka sekula enggau nembiak.

“Ngarapka semua kitai ulih bekerejasama dikena nentuka pemujur nembiak sekula tu seraya besaup mai pemansang ngagai sekula,” ku iya madah baru.

Aum sehari nya bela digulu Prinsipal sekula Wong Teck Ling.