KUCHING: Anang sekali nerima umpan kereja begaji besai nengah chara ‘online’ nyadika lalau seiku ari peranak Sarawak ke ditan di rumah jil Provinsi Banteay Meancheydi Kemboja, Brenda Welltinnie Winston ngagai nembiak bukai.
Dirandau pengudah sangkai di Bilik VIP Palan Penerebai Bilun Antarabansa Kuching (KIA) kemari, iya madah diri jera napi pemerinsa maya dinan di rumah jil pengelama dua bulan.
Brenda,21, asal ari mengeri Kuching madah sida seraban 40 iku peranak Sarawak diumpan gawa ba hotel begaji besai di Kemboja.
“Anang pecahayaka umpan kereja begaji besai nengah online, ketegal aku udah kena,” ku Brenda seraya ngendas ai mata.
Seiku agi sida ti sama udah kena tan, Nur Mohd Arif Bohari ,23, madah sida disemaya dibayar gaji USD1,200 sebulan gawa ba hotel di Kemboja.
Kereja nya ku iya ke asal ari Sibu diulih ari aplikasyen WeChat-Job Vacancy.
‘Tikit bilun kami ke Kemboja pan dianjung nengah aplikasyen WeChat lalu pengudah sangkai ba menua nya bisi orang ngambat kami di palan penerebai bilun.
“Pengudah dibai ke rumah endur diau, passport enggau telefon binching kami dirampas.
“Seminggu sekali aja diberi telefon binching nyentukka kami ditangkap polis Kemboja,” ku Arif.
Pemerinsa dinan dalam rumah jil pengelama 60 hari ku Arif enda ulih ditusuika agi.
“Awakka pengingat pait nya dikenang kami seumur idup, enda nemu bakani deka nusui agi,” tandu iya.
Ngenang kaul ke sama, Kaban Parlimen (MP) Santubong Dato Sri Wan Junaidi Tuanku Jaafar ba aum pengarang berita pengudah sangkai di KIA madah sida seraban bisi ngelawa 2 iti rumah besai endur sida diau sebedau ditangkap polis.
Ku Wan Junaidi, 2 iti rumah besai nya jai agi rumah jil ketegal sida ti diau di dalam nya dikurung enggau manah.
“Siti rumah endur nyimpan 20 iku lalu siti agi rumah urung penyauh 3.5 km endur nyimpan 35 iku sida ke bukai.
“Rumah tu semina bisi siti pintu tama lalu nya mih pintu dikena keluar kelimpah ti dipasang besi ba tetiap jendela,” ku Wan Junadi.
Wan Junaidi nyempulang Menteri Pengelantang Pendiau, Komuniti, Orang Indu, Ruang Bilik enggau Pemansang Anak Mit Dato Sri Fatimah Abdullah ngatur randau enggau Perintah Kemboja ngelepaska semua sida ke udah ditan ba jil nya.