Anda di sini

40 iku peranak Sarawak ti ditan di Kemboja udah datai kemari

 Seraban sida ke ditan ba rumah jil menua Kemboja sangkai di KIA kemari. Dipeda siku benung ngesan kaling iya ke enda dapat bejalai.
UDAH DATAI: Seraban sida ke ditan ba rumah jil menua Kemboja sangkai di KIA kemari. Dipeda siku benung ngesan kaling iya ke enda dapat bejalai.

KUCHING: 40 iku peranak Sarawak ke ditan di rumah jil Provinsi Banteay Meanchey, Popet iya nya tunga Barat Kemboja kenyau bulan Disember 2018 mujur pulai ke Kuching kemari.

Penerbai bilun ‘cater’ JC International Airlines ke dibayar Perintah Sarawak ari Siem Reap  nya sangkai di Palan Penerebai Antarabansa Kuching (KIA) urung jam 2.15 lemai.

Berindik enggau nya, sida diambat enggau ati gaga bala apai indai enggau kaban belayan bukai ke udah lama tusah ati, penerebai bilun nya mega mai Menteri Pengelantang Pendiau, Komuniti, Orang Indu, Ruang Bilik enggau Pemansang Anak Mit Dato Sri Fatimah Abdullah.

Fatimah ke megai tanggungpengawa ngatur runding enggau Perintah Kemboja ngelepaska sida dibantu Kaban Parlimen (MP) Santubong Dato Sri Wan Junaidi Tuanku Jaafar ke sama bela pulai nepan bilun ke sama.

“Kepala Menteri nganjung aku enggau Wan Junaidi berandau enggau Perintah Kemboja ngambika sida tau dilepas sereta dibai pulai.

“Kami mega dilalau ngambika randau tu bepelasarka undang-undang menua Kemboja ke patut dipebasaka kitai.

“Nengah saup mayuh bengkah opis menteri baka ke opis menteri pekara luar Kemboja sereta Wisma Putra kitai nerima berita manah kena 15 Disember dia semua sida diberi pemendar pansut ari jil lalu tau dibai pulai,” ku Fatimah.

Fatimah mansutka jaku nya ba aum pengarang berita di Bilik VIP KIA pengudah sangkai.

Penerebai bilun nya mega mai empat iku peranak Sabah alai sida deka terbai pulai ke menua diri ngena penerebai bilun malam tu (tadi).

Nusuika pemerinsa ngemujur randau ngelepaska sida, Fatimah madah sida seraban ngejang ari Kuching kena 14 Februari lalu sepengudah datai di Kemboja sida dibantu Dr Hassan Omar (Menteri Pekara ‘Khas’ Kemboja).

“Iya (Dr Hassan) mantu kami ari genap sukut nyentuk ngagai akim menua kemboja ngeluarka pemendar sida ke ditan nya ngambika dilepas,” ku Fatimah.

Ngenang kaul ke sama, Wan Junaidi madah pemujur randau  ti ngujungka 47 iku peranak Malaysia dilepas asil atur Perintah Sarawak ti udah nganjung menteri mutarka isu nya.

Ku iya, Perintah Kemboja bebasaka pengeran Sarawak ti udah nganjung menteri enggau kaban parlimen.

Ba KIA kemari, 40 iku sida ke ditan nya bertemu enggau bala apai indai diri ti udah lama nganti sereta sinuka penusah sida ke ditan pengelama dua bulan di rumah jil Provinsi Banteay Meanchey.

Siku ari sida enda dapat bejalai ketegal bisi napi pemedis ba kaki lalu disan kaling iya.