Anda di sini

Staf perintah nengeri, perintah besai dipinta bekerejasama meri servis ke pemadu manah

SIBU: Residen Bagi Menua Sibu Charles Siaw minta staf perintah nengeri enggau perintah besai seruran bekerejasama meri servis pemadu manah ngagai mensia mayuh.

Ku iya, pemereti ati mensia mayuh ngagai sida ti gawa perintah semina nyadi raban gawa perintah aja lalu nadai jaku ti madahka raban gawa perintah nengeri tauka raban gawa perintah besai.

“Enda ngira bagi ejensi tauka opis ti diari, nyadi raban gawa perintah, kerejasama, ulah bebatak asur enggau pangan diri patut diterenak.

“Berebak enggau nya, bala ketuai opis mega patut meri peransang ngagai raban gawa perintah ngambi nambahka agi pemanah enggau asil dalam servis,” ku iya.

Iya mansutka jaku tu lebuh bejaku ba pengerami ngintu Taun Baru China (TBC) Begulai Enggau Raban Gawa Perintah Di Sibu diatur Residen Bagi Menua Sibu di Dewan Kompleks Islam Sibu ditu, kemari.

Sama datai Chairman Kaunsil Mengeri Sibu (MPS) Datuk Tiong Thai King, ketuai komuniti China Temenggung Dato Vincent Lau Lee Ming, ketuai komunitiIban Temenggung Stanley Geramong, Pemancha James Semilan enggau Pemancha Datuk Wong Kie Yik.

Ku iya, pengawa nerenakka budaya ngemanahka pemanah ti seruran dikemeran endang patut dikena nentuka raban gawa perintah komited agi, bisi tanggungpengawa, regas enggau ransing gawa.  

“Kelimpah ari nya, nerenakka rampa ti lantang endur gawa beguna amat dikena nambahka rampa ti meruan enggau manah,” ku iya.

Nya kebuah kaul raban gawa perintah ba pengerami ngintu TBC nya ukai semina meri awak ngagai sida bekelala enggau pangan diri, tang mega begulai bebaik sereta negapka tanggam kaul antara sida empu, ku iya.

“Pengerami diatur mega ngemeranka pengawa beripai ari tetiap opis nyendiaka pemakai enggau ai irup lalu sida serumpu makai.

“Pengawa tu meri siti semengat ngagai opis nentuka pengerami lanchar enggau mujur ngemai pangka besai agi,” ku iya nampung.

Berebak enggau nya, sida ti datai dinah bemacham pemakai ti nyamai enggau diperindang beberapa raban MAKSAK sibu.