Anda di sini

Program Pemerindang Muzik Sape Pemadu Panjai Nadai Ngetu ba RTM Miri dilanchar kemari

MIRI: Sarawak Energy Berhad (SEB) nengah tanggungpengawa rama korporat (CSR) sida komited ngetanka pengerindu mensia mayuh kelebih agi rebak biak ngagai muzik asal lute tauka sape.

Mandal Presiden Eksekutif Servis Korporat SEB, Aisah Eden madahka bemacham program udah enggau benung dilanggur SEB dikena ngangkatka muzik asal sape ngambika enda lenyau nyerunyut jeman.

“Taja sape tebilang enggau beguna amat kelebih agi ngagai rebak ke dulu, kami dipadah ketegal pemain sape ti landik kemaya hari majak kurang.  

“Nitihka perati kami, pengangkun deka nampung pengawa asal ngagai rebak biak mega nadai entu nyenggala nyangka ketegal rebak biak mindah ke mengeri ti enda entu ngemeranka pengawa lama tauka pengerindu sida kelebih agi ngagai jeman digital enggau inovasyen ke-21,” ku iya.

Iya mansutka jaku nya lebuh bejaku bejadika Pemerindang Muzik Sape Pemadu Panjai Nadai Ngetu ba Radio Televisyen Malaysia (RTM) Miri ditu, kemari.

Sama datai ba pengawa nya iya nya Direktor Pengeluar Sitak Sarawak Zainal Abidin Asri Abd Wahid enggau Menijar Besai CSR enggau Penegap SEB Jiwari Abdullah.

Kenu ku Aisah, dikena ngetanka pengawa asal enggau pesaka sape, SEB udah ngaul kerejasama enggau Komiti Pemansang enggau Pengelikun Genturung Pendiau (JKKK) Long San dalam taun 2016 ari atur program latih nebah sape dikumbai Warisan Sape Telang Usan.

“Asil ari program tu, tebal agi penyereta ti mujur nembuka latih nyata sikar nebah sape lalu tu udah nyata diayanka ari pesereta beberapa iku sida ba pemerindang ikonik Rainforest Music Festival dalam taun 2017 enggau 2018.  

“Kelimpah ari nya, sida mega mujur ngaga album ti dikumbai Warisan Sape Telang Usan dalam taun nyin tadi,” ku iya.  

Ku Aisah nambah, beberapa graduet ari program latih sape nya mega deka mantaika penau sida empu ba Pemerindang Sape Nadai Ngetu berengkah ari kemari.

Pemerindang Muzik Sape Pemadu Panjai Nadai Ngetu pengelama 50 jam berengkah kemari mantaika pemerindang dipungkal siku lagenda Sape Menua, Mathew Ngau Jau.

Program tu disereta 54 iku pemain sape ke landik ari Baram, Tinjar enggau Belaga sereta sepenyampau 59 melodi sape asal ditebah chara besilih nadai ngetu sepengelama 50 jam pemerindang tu dibantai.

Pemerindang Muzik Sape Pemadu Panjai Nadai Ngetu keterubah diatur ba Malaysia tu nyadika pengawa ngambika dirikot dalam Malaysia Book of Records.

Mensia mayuh kelebih agi sida ti angkunka muzik asal sape tau datai ngelawa Auditorium RTM Miri ngambika meda enggau mendingka tebah sape berengkah kemari lalu dipelaba tembu urung pukul 11.30 pagi, Hari Minggu (17 Februari).