Anda di sini

Nama metadologi dikena KLBW mansik penyeranta: Masing

MASING
MASING

KUCHING: Sapit Kepala Menteri Tan Sri Dr James Jemut Masing deka nemu metodogi ke dikena Opis Menteri Menua Pesisir enggau Kandang Menua (KLBW) ba atur mantaika asil pansik ti udah netapka 28 pelilih menua ke pemadu seranta di Malaysia.

Ari 28 pelilih menua nya,13 di Sarawak.

Masing ke mega antropologis madahka iya ngembuan mayuh peneleba ba sentang chara ke dikena ngaga pansik tang enda semua meri asil ke nyengala betul lalu sekeda nya tau disangkal.

Iya madahka diri berasai tekenyit pengudah macha asil pansik KLBW ti netapka 13 pelilih menua di Sarawak entara ke pemadu seranta.

Masing ke mega Presiden Parti Rakyat Sarawak (PRS) madah “Aku ke suah ngaga mayuh bengkah pansik tang enda ulih meri penemu sentang pengamat asil pansik nya enti aku enda nemu sapa bagi ke ditanya, berapa iku ke ditanya enggau nama bansa tanya ke ditanya.”

“Seagi aku enda bulih penerang tu, aku enda ulih bejaku madah asil pansik nya nerangka pekara ke amat nyadi ba 13 pelilih menua nya,”ku Masing.

Ba tetiap pansik ku iya nambah, kualiti pansik pekara ke pemadu beguna.

Masing nambah pansik antropologis ungkup projek tesis PHD iya  “The Coming of the Gods” ambika chunto udah digaga enggau silik sereta nengah chara ke sistematik.

Tesis nya nusui baka ni pengarap Iban nentuka chara sida berunding enggau chara pengidup. Masing nembuka PHD iya ba taun 1982 di Australian National University, Canberra, Australia.

Nitihka asil pansik KLBW, Pelilih Pakan ditetap nyadi pelilih ke pemadu seranta di menua tu nengah penatai per kapita RM2,760.

Pelilih bukai di Sarawak ke ba dalam rintai iya nya Lubok Antu, Song, Kanowit, Selangau, Simunjan enggau Daro.

Ngenang kaul ke sama, Kaban Kunsil Nengeri Pakan Tan Sri William Mawan ngasaika metodologi ke dikena iya nya bepelasarka penatai pemisi ruang bilik ti udah netapka Pakan nyadi pelilih ke pemadu seranta, siti chara ke tau dikerandau baru.

Iya madah, nadai salah enti siti metodologi dikena nentu agih belanja ari perintah besai ngagai sitak parlimen nya tang enti pekara nya dikena ungkup tuju penguntung politik, iya minta Rina Harun enggau bala pemesai ejensi ke bekaul datai diri empu ke Pakan, meda pemansang ke udah nyadi dia diatu.

Mawan madah atur netapka Pakan nyadi sebengkah pelilih ke enda mansang besiping ngagai ejensi perintah ti ngelama tu udah bebendar ngemansang Pakan ari siti genturung pendiau nyentuk ke nyadi siti pelilih menua diatu.

Pakan diangkat nyadi pelilih menua ba taun 1998 lalu udah ngambi sekeda genturung pendiau ke pemadu jauh di Ulu Julau awak ke ulih nyapai status pelilih menua, ku Mawan.

“Aku enda setujuka tuduh ti madahka Pakan siti pelilih menua ke pemadu seranta di Malaysia ketegal ti semina bepelasarka penatai pemisi ruang bilik.

“Pakan meseti dipeda ba mungkur semua pekara, ambika chunto peda ba tikas kualiti pengidup semua rayat di Pakan ngambika enda disiping,’ku iya seraya madahka semua genturung pendiau di Pakan diatu udah bisi jalai alun enggau bekal lekterik ti udah manggai 97 peratus tauka bekal ai beresi ba ikas 60 peratus.

Semina 40 peratus aja kandang endur ti mengkang nguna bekal ai graviti tauka chara bukai.

Pakan mega mansutka lada chelum ke pemadu manah di dunya, ku Mawan nandu.

Iya nambah, aktiviti ekonomi di pasar Pakan diatu majak ngerembai lalu nya ulih dipeda ari lori ke tama enggau pansut bebaika asil kampung, sayur, buah enggau komoditi lada, getah enggau sawit.

Ketegal semua tu, tau ngasuh kitai tekenyit maya Rina madah sitak parlimen tu ke pemadu seranta di Malaysia, tandu Mawan.