KUCHING: Nyauka manggai 5,000 peranak ari 556 ruang bilik ba 11 rumah panjai di Telang Usan diatu udah ngasaika bekal kuasa karan 24 jam ari baruh Skim Bekal Kuasa Karan Alternatif Menua Pesisir Sarawak (SARES).
Nitih ku penerang berita ensanus, 11 komuniti menua entigis nyadi sebagi ari 82 genturung pendiau di sitak Baram dalam perambu deka disambung bekal kuasa karan 24 jam datai ba taun 2020 nengah solar tauka mikdro hidro ari baruh SARES.
Naka ke diatu, 38 komuniti di Baram udah dibekal ngena kuasa karan.
Ari baruh inisiatif Transformasyen Menua Pesisir Nengeri, SARES dipejalaika perintah nengeri enggau tuju deka nyendiaka bekal kuasa karan ngagai komuniti ke pemadu ulu di Sarawak nengah model pengawa kunsi perintah komuniti ti inovatif.
SARES dipelaba nyendiaka bekal kuasa karan ngagai 8,700 ruang bilik ba genturung pendiau pemadu ulu datai ba taun 2020.
Dilanchar dalam taun 2016, program beungkus RM500 juta tu udah ngenyampatka bungkur bekal kuasa karan ba nengeri tu ari projek ti tembu ungkup nyauka manggai 4,000 ari 8,700 ruang bilik.
Pengawa nyuaka projek udah diatur ba Long Nakan ensanus dikena ngenang pejalai projek enggau pengawa bekenaka kuasa karan ba 11 genturung pendiau iya nya Long Nakan, Long Sibong, Long Ikang, Long Kerangan, Long Nen, Long Sayan, Long Kesseh, Uma Bawang, Long Kawi, Ba Kabeng enggau Long Itam.
Komuniti dia bekerejasama enggau Sarawak Energy sereta raban kunteriktor sida ba pengawa ngaga sistem kuasa solar ungkup genturung pendiau sida empu ti dipilih laban napi pemar disambung ngagai grid.
Tetiap projek nyengkaum ngaga sistem alternatif ‘standalone’ ngena teknologi solar sereta nyilih injin api ti mar enggau inggar dikena nangkup peminta bekal kuasa karan ruang bilik baka penampak enggau kereban eleterik bukai.
Pengudah dilekat, sistem nya diserah ngagai komuniti nya ti deka ngatur enggau ngintu sereta sukung teknikal ari Sarawak Energy.
Menteri Bekal Ai enggau Elekterik Menua Pesisir, Dato Sri Dr. Stephen Rundi Utom bejadika pengawa nya ti mega digulu Menteri Muda Elekterik Menua Pesisir Datuk Dr Abdul Rahman Junaidi, Kaban Kaunsil Nengeri (ADUN) Telang Usan, Dennis Ngau enggau Kaban Parlimen Baram, Anyi Ngau.
“Sehari tu, bungkur penyampau tubuh menua pesisir domestik kitai iya nya 91 peratus. Perintah nengah Opis Menteri Bekal Ai enggau Elekterik Menua Pesisir deka nambahka pemesai bungkur menua pesisir selampur nengeri ngagai 97 peratus datai ba taun 2020 lalu nagit bekal kuasa karan ba semua manggai 2025.
“Kitai ngarap ulih nyapai juluk tu ari agih belanja penyampau RM2.37 bilion ari baruh Pelin Besai Bekal Kuasa Karan Menua Pesisir ti dikemendarka Kepala Menteri, Datuk Patinggi Abang Johari Tun Abang Openg,” ku Rundi ba atur pengawa nya.
“Nengah SARES tu, kitai ulih ngemajuka juluk nempa bekal kuasa karan selampur Sarawak ngambika ruang bilik ke pemadu ulu ulih ngasaika bekal kuasa karan 24 jam,” ku iya nambah.
“Aku muji komuniti ditu ari kerejasama enggau pengeran sida gawa sereta pengeransing bala bakih bukai ti ngaul diri nyengkaum tim SARES ari opis menteri enggau Sarawak Energy ti udah bejalaika SARES ti mujur ditu.”
Sama datai Direktor Bekal Kuasa Karan ba Opis Menteri Bekal Ai enggau Elekterik Menua Pesisir Syed Fauzi Shahab enggau bala pengari operasyen ti bekaul sereta bala ketuai raban bansa.
Ngarika Sarawak Energy iya nya Dr Chen Shiun ti nyadi Mandal Presiden Bekal Kuasa Karan Menua Pesisir.
“SARES tu bebida laban dilangkar ngambika dikena chara ti meruan ungkup timpuh panjai lalu ngaul bala komuniti ba renggat ngelangkar nyentuk ke renggat pengawa bejalaika nya,” ku Ketuai Pemesai Eksekutif Kumpulan Sarawak Energy, Datu Sharbini Suhaili ngelansa pasal inisiatif nya.
Ku iya, pengudah projek tembu enggau dipejalai, tim SARES meruan bisi meri sukung teknikal enggau matih bala komuniti bekaul chara ngena enggau ngintu sistem nya.
“Dudi hari, ari pemansang infrastruktur baka jalai, rumah panjai tu deka disambung ngagai grid besai tang kandang diatu, SARES ngasuh genturung pendiau ti jauh amat ari grid ulih nerima bekal kuasa karan.”