Anda di sini

Peranak Telang Usan udah nerima mayuh pemansang ari perintah nengeri

 Dennis ti dipeda ngabas Jematan Long Lama deka nentuka semua projek nya dipejalai enggau manah.
NENTUKA PROJEK DIPEJALAI: Dennis ti dipeda ngabas Jematan Long Lama deka nentuka semua projek nya dipejalai enggau manah.

MARUDI: Kaban Kunsil Nengeri (ADUN) Telang Usan madahka peranak di konstituensi iya udah nerima pemaik ba projek sepenyampau bejuta ringgit ke udah di pejalai perintah nengeri Sarawak.

“Aku andal kenyau ari taun 2011, nengah bantu ari perintah nengeri Sarawak, bejuta ringgit projek ti dikena ngemanah infrastruktur enggau perengkaguna pemun udah dipejalai di Telang Usan baka Jematan Long Lama, kuasa karan solar ti digaga ba rumah panjai, menara telco, jalai genturung pendiau, balai mensia mayuh, gerija enggau mayuh agi.

“Semua projek pemansang tu muntang dipejalai laban Telang Usan diarika pengari rayat ari baruh perintah nengeri. Enda mayuh projek ulih dipejalai nyema pengari rayat ari parti penyakal, tu raliti,” pia ku Dennis madah ngagai The Borneo Post pagi kemari.

Bekaul isu tanah, ti suah berebut pasal nya, ku iya, pekara tu endang suah nyadi ba semua alai.

Tang ari pemayuh isu tanah ti udah dipadahka komuniti ba selampur Sarawak, semua kes tu diatur nitihka atur undang-undang Tanah.

Ku Dennis nambah, iya seruran minta jaku tangkan ari perintah nengeri nyema bisi isu bekaul tanah. Nadai kuasa bukai agi ulih mutarka isu tanah dalam nengeri tu kelimpah ari perintah nengeri Sarawak. Suah agi peranak di nengeri kitai enda lantang ati nyema pemutus nya diasaika enda nitihka peneka sida tauka penerang ti enda datai.

Kelimpah ari nya, ba kenang politik, Dennis ke mega kaban PBB andal mojiriti peranak di sitak pegai iya nyukung Gabungan Parti Sarawak (GPS) tang agi mega bisi bala ti mimit nyakal parti nya. Kepala Menteri kitai Datuk Patinggi Abang Johari Tung Openg udah bejalaika mayuh inisiatif kenyau ari iya megai perintah nengeri Sarawak lalu iya ukai semina besemaya ngapa aja, tang bejalai ke renggat baruh nentuka semua projek pemansng nya dipejalai.