Anda di sini

Pengari rayat endang begunaka ripot ari ketuai komuniti

Advertisement
 Lee diuluka pengari Majlis Bandaraya Miri (MBM) lebuh ti meresa projek melakin jalai di Lembah Hijau kemari.
MATAU: Lee diuluka pengari Majlis Bandaraya Miri (MBM) lebuh ti meresa projek melakin jalai di Lembah Hijau kemari.

MIRI: Ripot timbal ari ketuai komuniti endang beguna ari pengari rayat dikena mutarka semua penanggul ti bekaul enggau infrastruktur di kandang menua sida.

Menteri Muda Dagang Temuai, Seni enggau Main Asal Datuk Lee Kim Shin madah, nya nyengkaum ngeripot tikas pejalai projek- ti nentuka kunteriktor ngemansangka projek nya nitihka spesifikasyen enggau timpuh ti ditetap.

“Aku nitihka jaku timbal ari sida. Aku begunaka penerang sereta ripot ti betul. Dini jalai ti jai, parit ke jai enggau pekara ti patut digaga. Aku endang begunaka ripot ari ketuai komuniti,” ku Lee.

Iya madah munyi nya ngagai pengarang berita sepengudah ngabas ngagai palan projek ngemanah jalai di tiga kandang endur ditu kemari.

Lee ke mega Kaban Kunsil Nengeri (ADUN) Senadin madah, kelimpah ari ketuai komuniti, komiti geturung pendiau mega dipinta sama ngatur pengawa matau tikas pejalai projek nya.

“Aku ngansak ketuai komuniti ngambika sama matau nentuka sida nemu nama pekara ti nyadi di kandang menua sida lalu penanggul nya patut dipadahka ngagai kami. Pantau mega kereja ti digaga kunteriktor,” ku Lee lebuh ti ngaga ‘spot check’ projek ke udah dipejalai di kandang menua nya.

Beserimbai enggau nya, ketetiga projek melaik jalai ti diperesa kemari iya nya ari baruh agih belanja Projek Transformasyen Menua Pesisir (RTP) ungkup DUN Senadin.

Lee puas ati enggau tikas pejalai projek nya ti nitihka timpuh ke dilangkar.

“Bisi sekeda projek benung dikemansang. Entara nya projek balai raya di Tudan. Aku kediri deka meresa tikas pejalai projek RTP nya dikena nentuka nya tembu,” ku iya nambah.

Bekaul pengawa ngabas nya kemari, sepenyampau RM605,000 udah dikena melakin baru jalai di tiga kandang endur iya nya RM205,000 ungkup projek di Jalai Riam lalu bela beungkus RM200,000 ungkup projek di Lopeng Tengah enggau Lembah Hijau.

Ketetiga projek tembu nitihka timpuh dua bulan dipejalai ke berengkah bulan Disember taun nyin tadi.

Sekeda projek baru deka dipejalai di kandang menua iya ba taun tu.

Advertisement