Anda di sini

BDA tetap ngatur pengerami ti ulih ngempung pupu bansa di Bintulu

 John Sikie enggau bini (tengah), Rodziah, Troy, Andy (kanan), Hii, Haidar, Jack (kiba) sereta ke bukai ngaga ‘Lao SHeng’ kelai bejadi Pengerami Nerima Pengabang Taun Baru China BDA FORCA BIntulu di Food Bazaar The Spring Bintulu kemari.
TERUS LANTANG SENANG: John Sikie enggau bini (tengah), Rodziah, Troy, Andy (kanan), Hii, Haidar, Jack (kiba) sereta ke bukai ngaga ‘Lao SHeng’ kelai bejadi Pengerami Nerima Pengabang Taun Baru China BDA FORCA BIntulu di Food Bazaar The Spring Bintulu kemari.

BINTULU: Kaunsil Pemansang Bintulu (BDA) deka terus ngatur pengawa ngintu pengerami ti ulih mantu ngempung sereta nyerakupka komuniti pupu bansa di bagi menua tu sereta narit ati mensia mayuh ngambika sida deka nyereta pengerami bansa nya lalu nadai ngasai diri dilengka.

“Ukai semina pengawa ngintu Taun Baru China tang mega Hari Gawai bisi diatur kami di rumah panjai lalu Hari Raya di rumah rasmi BDA, lalu pia mega BDA endang ngelaluka kerejasama ngatur pengerami begulai bansa nya enggau semua raban,” pia ku Menijer Besai BDA Rodziah Morshidi.

Berindik ari nya, ku iya, Pengerami Nyambut Pengabang Taun Baru CHina ti diatur BDA enggau kerejasama Gempung Gerempung China Berejister Bintulu (FORCA) sekali tu digaga dalam taun ti keempat ba palan ti enda sebaka ninting taun kelebih agi di palan ti ulih digusung mensia mayuh.

Ku iya nambah, ba taun ti keterubah ngagai taun ketiga pengerami nya diatur ba Taman Koridor Sejarah enggau Main Asal Bintulu, Naim Paragon Street Mall, Commerce Square Mall lalu ba taun tu diatur ba palan bebelika barang iya nya The Spring Bintulu ti sama mantaika pemanah rampa endur bebelika barang ti manah.

“Kami ngelaluka kerejasama rat enggau FORCA ti udah ngumpul pemisi lalu udah ngerintai aktiviti ti nemban enggau ngintu pengerami nya,” ku iya bejaku lebuh ti bejadika Pengerami Nerima Pengabang Taun Baru China BDA enggau FORCA Bintulu di FoodBazaar The Spring Bintulu kemari.

Ba kenang ke bukai, Rodziah ngansak kerejasama semua raban ngambika nyaga pemeresi mengeri BIntulu lalu udah madahka ba taun tu (2019) ti nyadi taun ungkup BDA bejalaika pengawa neritka adat ke nyata dalam pengawa nagang ‘kutu uras’ (sida ti muai uras sebarang endur) kelimpah ari semina ngatur kimpin meri pelajar enggau mimit pengawa neritka adat ti diatur taun nyin kemari.

“Meri pelajar enggau penyedar ngagai komuniti ukai siti pengawa ti muntang, ukai baka ngaga sebuah begunan ti begunaka sukut injiniring ke manah sereta pengelandik ngatur projek dikena nentuka pengawa ngaga nya ulih bejalai enggau mujur.

“Deka nyedarka komuniti iya nya siti pengawa ti enda muntang, kami patut terus ngatur pengawa nya tang empas tetiap kali aku ke Kcuhing mayuh raban ti madahka nya ngagai aku siti pengawa ti manah ungkup Bintulu. Nya ukai semina pengawa aku siku aja tang asil ari pengawa beripai dalam BDA,” ku iya nerang.

Ketegal nya, Rodziah minta ngambika peranak Bintulu bekereja begulai enggau BDA ngambika sama bela nyaga pemeresi mengeri Bintulu ari uras enggau atur dekadigaga ari baruh Undang-undang Mit 18(1)(f) The Local Authorities (Cleanliness) By Laws 1999 dikena nagang ulah kutu usar sereta ngatur ‘Fun Run and Plogging’ iya nya pengawa belanda seraya ti ngumpul uras.

“Kami ngelalu kerejasama semua raban dikena nyaga pemeresi BIntulu laban bagi menua tu mungkur kandang menua ti besai,” ku iya nambah.

Iya meri chunto bekaul pengawa ngemanahka kandang tebing Pantai Tanjung Batu ti ngena ungkus bejuta ringgit ukai semina udah ngelakuka palan nya tang mega meri pemaik ngagai Bintulu sereta bala temuai ti datai ari selampur Sarawak pan mega dikearap ngambika nerima palan ngelantangka ati nya ulih diintu enggau manah ari semua.

Presiden FORCA BIntulu Hii Toh Him madah, pengerami ngintu Taun Baru China nyadi entara pengerami ti ulih mantu ngiri pengelantang komuniti pupu bansa di bagi menua tu entara nya enggau pengawa ngatur pengerami nerima pengabang ti bansa tu.

Ku iya, nya mega pengerami ti ulih ngempung semua diri sebilik ngambika ulih berami begulai enggau rindang.

Iya mega beterima kasih enggau pengawa sereta kerejasama entara FORCA enggau BDA enggau ngatur pengerami nerima pengabang Taun Baru China begulai ninting taun.

Kelimpah ari nya, Ketuai Pemesai Operasyen ti mega Direktr The Soring Management Services Andy Song madah, sida andal enggau sukung semua peranak BIntulu ngagai palan bebelika barang nyav kenyau ari ti dibuka kena 18 Januari taun tu ke mega udah muka mayuh agi peluang gawa enggau nanam puku dagang ditu.

Ku Andy madah, penumbuh nya udah muka makit ungkup semua tang agi ngarapka semua raban patut nyukung pengawa BDA ti deka nyadika BIntulu beresi sereta ngarapka mengeri nya deka terus lantang sereta penyerakup pearanak ditu terus rat.

Pengerami nya udah diisi enggau pengawa meri ‘angpao’ sereta sekeda barang ti dikena besehari-hari ungkup sida ti begunaka bantu.

Sama bisi datai ba pengerami nya Menteri Muda ba Opis Kepala Menteri (Undang-undang enggau Adat Bumiputera) ke mega Kaban Kunsil Nengeri (ADUN) Kakus Datuk John Sikie Tayai sereta bini iya, Chairman Parkciti The Spring (Bintulu) Sdn Bhd Troy Yaw, Sapit Chairman BDA Haidar Khan Asghar Khan, Residen Bagi Menua BIntulu Jack Aman Luat enggau sapit iya Hussaini Hakim.

Kelimpah ari nya, Penyanding Penemu FORCA Datuk Wong Aik Loung, Chairman Parti Rayat Bersatu Sarawak (SUPP) Ching, Temenggong Datuk Barry Yek, Pemancha Datuk Dr Francis Toh, ketuai komuniti ke bukai sereta pengari gerempung di kandang menua tu.