Anda di sini

Untung diulih raban berikan belipat rambau musim bubok

 Bubok (kanan) enggau rumpong (kiba) dijual laku amat.
ASIL TASIK: Bubok (kanan) enggau rumpong (kiba) dijual laku amat.

MIRI: Musim bubok datai baru di Miri ditu lalu tu endang dianti raban berikan ngulihka penatai pemisi tambah ungkup ruang bilik sida sekali setaun.

Siku orang berikan ari Kampung Pulau Melayu, Miri Daud Lamat madahka anak undai bisi dipeda raban berikan kemari ari Kampung Batu Satu Lutong lalu tu penatai keterubah.

“Gawa deras agi rambau musim tu laban raban berikan semina diau dalam bot sida aja sereta makai enggau ngirup dia lalu sida semina mulaika kediri ke tebing tasik enggau asil anak undai dalam talam,” ku Daud ngenang pekara kala diasai lebuh ngambat anak undai tauka dikumbai peranak menua tu bubok.

Kenu ku Daud, bubok ti diulih sida kemari agi baru amat ke alai chura bedau entu mansau endar, bubok bechura mansau chechinang ngembuan kualiti ti manah dikena ngaga belachan.

Ku iya, bubok diulih kemari ditangguk sida semak kandang tasik Kuala-Baram enggau Lutong lalu tu bubok ngaban keterubah ditangguk sida laban pemisi gaya hari ti angat.

Iya madahka bubok tu laku amat dijual RM8 sekilo laban nadai mayuh diulih lalu semua berebut deka meli bubok dikena ngaga belachan tauka enchalu.

“Aku berasai lantang amat meda musim bubok benung diatu lalu kami ulih meda raban berikan berengkah ngemai pakak sida sereta kandang tebing tasik Lutong nyentuk Pulau Melayu deka didedat mensia mayuh.

Daud nyemetak madahka tu deka nyadi penatai pemisi tambah ngagai sida ti ngemeranka pengawa berikan enggau sida ti bebagi jam gawa berikan sereta mega peranak bukai maya lepa ujung minggu deka nurun ke tasih nangguk bubok kediri empu.

Ku iya, maya musim bubok, tetiap bot bisi dua iku raban berikan deka teulihka lebih ari 10 talam sehari lalu tu ungkup dijual bini sida ba bangsal ikan ba sepanjai tisi jalai di Lutong-Kuala Baram enggau endur bukai.

Iya madahka ukai semina bubok aja bisi peminta tinggi ari peranak menua tu, tang mega sida ari bagi menua bukai di Sarawak enggau Brunei laban asil tasik ti beresi lalu nadai rau ti diulih raban berikan ditu.

Siku orang berikan bukai, Herman Hamdan ari Btu Satu Lutong madah, musim bubok suah agi nyadi pengudah Taun Baru China enggau ulih manggai beberapa minggu nyentuk sebukan pengudah renggat keterubah musim iya.

Ku iya, enti bisi nasit, sida ulih bulih penyampau 10 talam bubok tetiap kali nurun nangguk.

“Diatu bubok ulih dijual ngena rega RM8 sekilo, tang rega deka nurun ngagai RM3 sekilo maya musim nyadi,” ku iya.

Taja iya semina fukus ba pengawa nangguk bubok diatu, ikan berega bukai diatu mega bisi laban ikan nya datai semak ngagai kandang tebing tasik makai anak undai, ku iya nambah.

Pia mega ku iya, bisi peminta tinggi bubok ari gaya sida ti meli udah nganti ba bangsal iya ti diintu bini enggau indai iya.  

Ari tinjau dipejalaika The Borneo Post ba bangsal pasar basah meda sebagi ari bubok, bemcham bansa ikan idup mega bisi dijual dia.

Bot berikan enggau tangguk sida meruan ditanchang dikena nangguk bubok ti ayan ba mua ai chiru lalu ulih dipeda nyemerai semak.

Minggu tu baru manggai renggay keterubah musim bubok, lalu asil diulih raban berikan dipelaba nambah enti gaya hari angat.