Anda di sini

Sukung penuh diberi ngagai program AMS 2019: Karim

 Karim (dua kiba) nerangka pekara enggau industri fesyen rambau Aum Media bekaul enggau Alta Moda Sarawak 2019 diatur ba Restauran Budaya ditu, kemari. Bela bisi dipeda Easter (dua kanan) enggau sida bukai.
AUM PENGARANG BERITA: Karim (dua kiba) nerangka pekara enggau industri fesyen rambau Aum Media bekaul enggau Alta Moda Sarawak 2019 diatur ba Restauran Budaya ditu, kemari. Bela bisi dipeda Easter (dua kanan) enggau sida bukai.

KUCHING: Opis Menteri Dagang Temuai Seni, Main Asal, Nembiak Lumba enggau Main Sarawak meri sukung penung ngagai program Alta Moda Sarawak (AMS) 2019 ke diatur dalam bulan Mac ti deka datai.

Menteri iya, Datuk Abdul Karim Rahman Hamzah madah kitai andal AMS nyadi pelasar ke chukup manah ungkup penengkebang fesyen ari Sarawak betapat enggau mandangka asil tempa jari sida ngambika dikerembai ngagai serata dunya.

“Tu seriris enggau juluk kitai ti benung ngelakuka ‘Kimpin Nemuai Ke Sarawak’. Kitai mega optimis AMS ulih nyaup ngelakuka chap fesyen sida ngerembai ngagai serata dunya.

“Chukup berasai gaga laban AMS diatur ba begunan DUN Lama ke ngundan mayuh sejarah. Tu endang palan ke engkeman laban mayuh aktiviti bekaul enggau seni, teater, muzik enggau main asal diatur ditu.

“Arapka jemah AMS ukai semina nyadi pemandang fesyen tang mega nyadi aktiviti daya idup. Nya kebuah ba penemu aku rambai jaku ‘Alta Moda’ manah agi disebut ‘Nentuka Baru Fesyen Pengidup’.

“Fesyen endang pekara nyata ba dunya kemaya hari tu ti chukup beguna lalu seruran berubah,” ku iya.

Iya madah munyi nya ba aum media bekaul enggau Alta Moda Sarawak 2019 diatur ba Restauran Budaya ditu, kemari.

Berebak enggau nya, Karim madah, penengkebang fesyen Malaysia baka Dato Tom Saufi, Bon Zainal, Voon Jolly, Melinda Looi enggau Zang toi entara nama ke chukup nyulut ketegal kualiti fesyen ke udah ditempa ngujungka nama Malaysia dikelala ba serata dunya.

“Pia mega, kitai di Sarawak enda tinggal nitihka pemansang ba industri tu. Kitai bisi penengkebang enggau pematih ke ngemegah iya nya Paul Carling, Anna Sue, Ben Nazry, Melinda Omar, Sereni & Shentel, Koleksi Latip enggau ke bukai.

Nya alai, nengah AMS penau sida deka terus ngerembai. Program tu mega dikearap ulih matak mayuh temuai ke Sarawak bela berati pemanah pengelandik asil jari tauka kraf ditempa sida.

Industri fesyen endang sebengkah industri bebilion dolar ba serata dunya. Tu beduduk ari bidang tu mungkur semua renggat umur enggau bemacham batang pengawa. Bisi mega orang ngambi peluang tu nyadi penulis, ngaga pansik lalu mantaika penemu tambah kelimpah ngaga blog bekaul enggau dunya fesyen, ku Karim.

Sama bisi dtai Chairperson program Datin Esther Mujan Balan, Menijar Direktor ke mega Pemungkal Industri Fesyen Dato Raymond Valentine Jolly, Direktor Pengerami Kaunsil Dagang Temuai Sarawak Angelina Bateman enggau ke bukai.