BA KABENG, Ulu Baram: Bansa Penan di ulu Baram dipinta ngena memanah pemesai dandang tanah sida ngambi mansutka asil utai tanam dikena ngenegapka agi ekonomi menua pesisir sereta nyungkak status ekonomi rama peranak menua pesisir.
Mansutka peminta tu, Kaban Kunsil Nengeri (ADUN) Telang Usan Dennis Ngau nyemetak madahka tanah nyadika pun pengidup bansa Penan enggau komuniti Orang Ulu laban meri sida pemakai enggau kereban bukai dikena nangkup peminta pemun sida.
Tanah ngembuan reti chukup besai ba pengidup komuniti Orang Ulu kenyau ari sida ngetanka pendam aki ini lalu nanggam kaul entara rebak ke diatu enggau dulu menya.
Taja komuniti Orang Ulu diberekat enggau dandang tanah ti besai, isu tanah ti enda diperimba agi tubah antara sida lalu tu patut diperunding memanah ngambika sida ulih ngasaika idup menyana agi diatu, ku Dennis.
“Tanah tu nyadi pengeraja komuniti Orang Ulu. Taja pia, enti semina bisi tanah aja tang enda diperimba tauka puntan mansutka asil ba tanah ti diambu enggi sida.
“Nya kebuah aku deka ngansak bansa Penan enggau komuniti Orang Ulu ngena memanah tanah sida ari pengawa chakah ngaul diri ba dagang betanam betupi enggau utai tanam dagang dikena ngangkatka ekonomi menua pesisir sereta ngemai sida ngagai kualiti idup ti menyana agi,” ku Dennis lebuh bejaku bejadi projek kuasa solar Skim Bekal Kuasa Karan Menua Pesisir Alternatif Sarawak (SARES) enggau begunan gerija baru ditu, apin lama ke udah.
Dennis ngansak peranak menua pesisir regas bepintaka mayuh macham program enggau skim dikena nyaup raban bumai nyadi pedagang ti mujur, nyengkaum ari sida ari Opis Betanam Betupi nengeri.
“Aku deka meransang peranak menua pesisir kitai nanam utai tanam dagang baka nanas, kupi, pisang, chabi enggau ke bukai nyadika asil ti ulih dijula ba makit diatu enggau semak ditu.
“Bala ketuai komuniti, ketuai genturung pendiau endang diansak ngiga penerang tauka ngiri penemu baka ni chara ngaul diri ba pengawa betanamka utai tanam dagang tu ari Opis Betanam Betupi ba Long Lama, Marudi enggau Miri,” ku Dennis, seraya nambah, semina tu aja chara dikena mantu peranak menua pesisir ngenegapka ekonomi sida.
“Kitai ti nyadi peranak menua pesisir enda tau enda ransing agi gawa enggau mesti bejalaika inisiatif ngiga jalai ngemansangka ekonomi diri empu taja lubah laban kitai ulih nempa makit besai agi, nadai projek besai digaga ba Ulu Baram. Kitai patut nerima pekara nyata ke alai pekara deka belubah datai ba menua pesisir baka Telang Usan,” ku iya nambah.
Beratika status ekonomi rama komuniti Orang Ulu, ku Dennis, kelebih agi bansa Penan menkang jauh tinggal dibelakang laban komuniti nya diperatika laun nyingkang ditambah suntuk pelajar nagang sida ari nerima bayar gaji ti patut tauka kereja entap.
Taja pia, iya ngaku komuniti Penan benung ngalih ngagai jalai idup moden ari runding chara lama sereta seranta.
“Asil ari pengeran perintah nengeri enggau ulah enda mantul ngapa, bansa Penan ba nengeri tu diatu udah ngalih baka komuniti bukai, nya kebuah kita patut badu malik ke belakang, tang majakka singkang nuju pengidup menyana agi. Sida ulih mida ni bagi pekara ti manah enggau pekara ti jai.
“Kitai mesti pintar beratika pekara lalu seruran ngenang pekara diterima, nyengkaum datai ari perintah enggau pengari rayat.
“Anang alah asut orang tauka raban ti ngembuan agenda politik sida empu, tang gawa begulai enggau aku ti nyadi pengari kita enggau perintah nengeri,” ku Dennis.
Ngelansa pasal projek Sares, ku Dennis, projek baka tu nyata ngayanka perintah nengeri Gabungan Parti Sarawak (GPS) endang keran deka nyaup komuniti menua pesisir ba pengawa sida mansang ke mua ngipakka diri ngagai pemansang arus besai .
Tetiap sen dibelanja ba projek solar di Sarawak datai ari perintah nengeri, ku iya madah nyemetak.
Nya alai iya minta peranak menua pesisir ari Baram seruran gawa rat enggau perintah nengeri nentuka pemujur mayuh bengkah program enggau aktiviti diperambu ungkup sida.
Dennis mega muji raban bansa Penan udah ngemesaika Tuhan ba pengidup sida. Taja tebal agi bansa Penan agi tinggal ba sukut ekonomi, tang sida ngemeratka pekara gerija.
Kelimpah ari endur besembiang enggau kelai pengarap, gerija menggi pangku pengawa besai amat ngerembaika jaku Tuhan enggau jalai idup baru, ku Dennis.
“Kenyau ari kitai megai pengarap Kristen dalam taun 1028, gerija udah nyadi palan idup kitai nyengkaum ngajar kitai idup meruan agi ba semua pekara.
“Aku pechaya sida ti ngemesaika Tuhan dalam idup nyadi orang ti nyingkang mansang. Majak tegap pengarap kitai, makin jauh kitai deka maju,” ku iya nambah.
Berebak enggau nya, Dennis ngemendarka agih belanja penyampau RM5,000 ngagai Ba Kabeng dikena ngatur aktiviti sida nyengkaum pengawa nyikap gerija.
Seraya Ketuai Kampung Ba Kabeng, Wan Jutang meri tabi basa ngagai Dennis ti nadai kala puntan nyuaka pemeri kelebih agi ungkup pengelantang genturung pendiau sida.
“Aku deka meti tabi puji ngagai YB Dennis Ngau enggau perintah nengeri GPS ti seruran mantu kami ba mayuh bengkah pekara. Enti nadai Dennis enggau GPS, kami terus idup dalam pemetang sereta nadai ngembuan gereja ti meruan baka diatu.
“Ari bantu YB Dennis, kami diatu ulih ngasaika idup baru. Nya kebuah aku ngansak bansa Penan semampai meri sukung tegut ngagai perintah nengeri GPS ngambika pemansang ba menua pesisir kitai ditu seruran bisi,” ku Wan.
Sama datai pengari Pemesai Pelilih Telang Usan Baru Tai, Isai Bala, Presiden Serakup Nembiak Orang Ulu Sarawak Spanski Steven enggau bala pengari ari mayuh bengkah genturung pendiau besemak.