Anda di sini

Tiga manuk sabung PKR Baram deka nyatup GPS

 Roland (duduk, lima kanan) begulai enggau bala komiti PKR Baram lebuh baum kemari.
UDAH SEDIA: Roland (duduk, lima kanan) begulai enggau bala komiti PKR Baram lebuh baum kemari.

MIRI: Parti Keadilan Rakyat (PKR) deka bediri minta pilih ba tiga sitak Bepilih Kaunsil Nengeri (DUN); N76 Marudi, N77 Telang Usan enggau N78 Mulu di Baram ba Pengawa Bepilih Nengeri (PRN) tu.

Chairman PKR Baram Roland Engan ti mega udah diberi mandat ngetuaika wilayah Baram ari bala kaban sida madahka kesemua tiga chalun bepenau PKR tu udah dikelala lalu nama sida deka dianjung ngagai bala ketuai tetinggi PKR di Sarawak.

“Kitai udah ngelala tiga chalun lalu deka nganjung ngagai PKR Sarawak ngambika diperunding,” ku Roland rambau aum khas PKR Baram ti diatur ba Hotel Telang Usan, Miri, kena lemai Hari Minggu.

Sepenyampau 29 iku kaban komiti baru udah dipilih datai ari raban bansa Iban, Kayan, Kenyah, Berawan, Kelabit, Saban, Kiput, Melayu enggau China.

Kenu ku Roland, lebuhka baum, semua kaban komiti setujuka PKR deka bediri minta pilih ba kesemua tiga DUN (Marudi, Telang Usan enggau Mulu) ngelaban chalun GPS.

Iya nyemetak madah, semua chalun bepenau nya bisi penyukung sida empu ba renggat baruh lalu diatu gawa rat begulau enggau rayat.

Ku iya, peranak Baram deka meda enti enda bepadan nengali alan ba tiga penuduk DUN tauka mayuh ari ba PRN ila laban PKR sedia ngerampas penuduk ari GPS.

Ba lansa bukai, Roland madahka PKR Baram deka nampung pengawa sida bejalai ngabas rayat lalu beratika bantu ke alai tebal agi penanggul ditapi sida tu iya nya isu tanah Adat Bansa Asal (NCR) enggau suntuk infrastruktur.

Seraya lebuh baum, Roland Engan udah diberi sukung nadai bebagi dipilih ngetuaika PKR Baram ungkup penggal 2018-2021.

Diatu, penyandang DUN Marudi iya nya Datu Penguang Manggil seraya DUN Telang Usan disandang Dennis Ngau lalu DUN Mulu enggi Datu Gerawat Gala.