SARIKEI: Sepenyampau RM10,000 udah diungkupka ngagai tetiap buah sekula sekondari, lalu RM5,000 ungkup sekula primari ke pemaik aktiviti sekula dalam sitak Kunsil Nengeri (DUN) Repok ungkup suku keterubah taun tu.
Kaban Kunsil Nengeri (ADUN) Repok, Dato Sri Huang Tiong Sii madah,belanja nya diagih dikena nentuka semua sekula sekondari enggau primari dalam DUN Repok ulih bejalaika aktiviti sekula dikena nempa rebak biak ke bisi penau, regas,ulih besemekih sereta nyulut.
“Kita deka meda mayuh agi rebak biak ari DUN Repok ditempa nyadi mensia ke bekualiti jemah ila.
“Nya alai, kami beratka pekara ke bekaul enggau rebak biak, kelebih agi bekaul bidang pelajar,” ku iya ba Pengerami Ngintu Taun Baru China renggat DUN Repok, apin lama udah.
Pengerami nya udah diatur ba Dewan Central Market Sarikei sereta udah digulu lebih 1,000 iku.
Ba pengerami ke sama, Huang mega madahka pemansang deka mayuh agi dibai ngagai mensia mayuh kelebih agi ngagai DUN Repok.
“Nya mih batang juluk kami. Diatu kami benung fokus ngaga sistem penyambung baka jalai darat ari Sarikei ke Tanjung Manis.
“Nitihka pelin, projek ngaga jalai ari Sarikei ke Tanjung Manis,nyengkaum ngaga siti jematan deka berengkah digaga taun tu.
“Pekara tu beguna amat dikena nentuka aktiviti pemansang dalam sitak tu ulih dirichahka agi sereta meri pemaik ke positif ngagai sosioekonomi peranak ditu,” ku Huang.
Ba pengerami nya mega, Huang minta mensia mayuh ke diau ba kandang pasar majak negapka kaul enggau pangan diri enda ngira bansa enggau jalai pengarap.
“Konsep penyerakup ke baka tu patut diratka agi,enti kita deka majak ngasaika pengelikun enudah diintu kitai kenyau ari kelia.
“Mensia mayuh patut nemu sentang pemesai reti siti bansa ke beserakup,kelebih agi ari pegai baruh siti perabung.
“Jaku tangkan tu ukai semina ungkup rebak biak tang mega semua renggat raban bansa. Kami deka ke rayat terus beserakup dalam semua pekara. Anang ngadai pengidup menua jemah ila semina ketegal penyerekang enggau pangan diri.
“Nya alai, tanka mih pengelantang,tegapka penyerakup lalu pandangka patriotisme laban nya pun nuju pemansang enggau pengelantang menua,” ku iya.
Ba pengerami nya, Huang udah ngawakka diri begulai enggau mensia mayuh di menua seraya nyadung ‘angpau’ ngagai nembiak mit ke bisi ngulu pengerami nya.