KUCHING: Mandal Parti Keadilan Rakyat (PKR) Sarawak See Chee How madahka niang Datuk Andrew Wong siku orang ke chukup sebagai kering sereta seruran positif mantu Sarawak.
See ke mega Kaban Kunsil Nengeri (ADUN) Batu Lintang madahka diri enda nemu bejaku agi dikena mandangka penyinu ati iya laban Sarawak lenyau siku ‘anak’ ke chukup manah.
Andrew ke mega ex- Sapit Chairman Majlis Perbandaran Sibu (MPS) sereta anak Menteri Wang Kedua, Dato Sri Wong Soon Koh.
“Aku bedau agi betemu enggau Andrew, ke benar iya kami merambu betemu nengah Dato Sri Wong berandauka utai ke patut sereta ngatur numbuhka undang-undang di UTCS ti dikerinduka Dato Sri Wong, Andrew, tang enda sempat.
“Ke bendar, niang (Andrew) mayuh udah nyaup UCTS enggau MPS maya iya ke agi gawa. Ngarapka semengat iya likun din.
“Aku besampi ke Dato Sri Wong enggau sida sebilik ngambika puh napi penusah tu. Sarawak begunaka iring enggau servis nuan,” ku See.
Andrew, 44 ditukuka udah midang urung pukul 11 malam Hari Minggu nyin tadi, pengudah ditemu indai iya Datin Sri Pauline Leong enda ngeleda dalam bilik tindok iya urung pukul 9 malam.
Taja pia, maya berita tu ditulis keb uah ke bendar Andrew midang bedau ulih ditukuka laban agi nganti buntas pansik ti patut dipejalaika ambis laun kemari.