KUCHING: Pengawa mulaika status Sarawak enggau Sabah nyadi siti entiti dalam Malaysia siti langgur penemu ke manah tang enda mudah dipejalaika.
Sapit Kepala Menteri Tan Sri Datuk Amar Dr James Jemut Masing madah, nya laban Sempekat Malaysia 1963 (MA63) udah nyata madahka Sarawak enggau Sabah dua menua ke kediri dalam Gempung Besai Malaysia.
“Tu engka langgur politik ke manah tang dipadahka mudah agi ngereja laban MA63 udah nyata madahka Sarawak enggau Sabah dua menua ke kediri dalam Gempung Malaysia,” ku iya kemari.
Masing ke mega Menteri Pemansang Infrastruktur enggau Perengka Pengangkut madah, nyema Sarawak enggau Sabah deka digempung nyadi siti entiti, MA63 enda tau enda diserenih baru.
Kelimpah ari nya ku iya, parlimen enda tau enda setuju enggau Dewan Kunsil Negeri (DUN) kededua nengeri (Sarawak enggau Sabah) meseti nyukung.
“Enti kitai deka ngempung Sarawak enggau Sabah nyadi siti entiti, MA63 enda tau enda diserenih baru lalu parlimen meseti setuju lalu kededua DUN meseti nyukung,” ku iya nyemetak.
Kemari Kepala Menteri Sabah, Datuk Seri Mohd Shafie Apdal minta semua nyukung pengawa perintah mulaika status Sabah enggau Sarawak nyadi sebuah menua baka ke dalam MA63.
Tambah Shafie, pekara nya udah dikerandau enggau Menteri Besai Tun Dr Mahathir Mohamad maya ke betemu berandauka MA63 apin lama udah.
“Lebuh ke betemu nya, kami udah nyebut pekara sentang status penuduk sabah enggau Sarawak nyadi menua. Aku pechaya Perintah Besai ngemendarka pekara nya laban bisi dalam MA63,” ku iya.
Iya bejaku munyi nya lebuh dikerandau pengarang berita maya Pengerami Taun Baru China 2019, Parti Warisan Sabah (WARISAN) Tanjung Aru, Kota Kinabalu Sabah, kemari.