SIBU: Polis madahka kes pemati ex-Sapit Chairman Opis Kaunsil Sibu (SMC) Dato Andrew Wong Kee Yew kes mati ngenyit lalu diatu benung nganti pemutus pansik.
Ketuai Polis Sibu Asisten Komisioner Stanley Jonathan Ringgit madah, naka kediatu piak sida agi nganti pemutus ari sepital.
Ku iya, sida udah nerima ripot bekaul pemati nya sepengudah indai niang, Datin Sri Pauline Leong tetemuka iya enda ngeleda urung pukul 9 malam kemari.
“Kitai minta mensia mayuh anang nempa cherita sebubu ngapa dulu nyentuk pemutus ari sepital ditemu,” pia ku iya maya berandau enggau media ba rumah niang di Jalai Ipoh, kemari.
Kee Yew, 44, ninggalka siku bini enggau dua iku anak; siku laki enggau siku indu.
Niang anang tunggal Presiden Parti Rakyat Bersatu (UPP) ti mega Menteri Wang II Dato Sri Wong Soon Koh.
Kepenudi niang dipeda ba mua mensia mayuh maya nyambut penatai Kepala Menteri Datuk Patinggi Abang Johari Abang Openg ngulu pengerami nyambut pengabang ke diatur apai iya, hari Enam tu tadi.
Maya Pengawa Bepilih Besai Ke-14 (PRU14), niang ti mega penengkebang Kolej Universiti Kolej Sarawak bediri ba Parlimen Sibu nengah tikit Barisan Nasional (BN).
Taja pan baka nya, penuduk nya diempu chalun Parti Tindakan Demokratik (DAP) Oscar Ling Chai Yew.
Dua iku chalun ke bukai iya nya Simon Tiong Ing Tung ari Parti Reformasi Negeri Sarawak (STAR) enggau Jamie Tiew Yen Houng Sarawak Peace Party (SPP).