Anda di sini

Bansa Dayak dipinta nyukung Bazar Gawai Dayak ke diatur ninting taun

 Vicky (duduk tiga kanan) disempulang bala komiti pengatur GDB 2019.
SUKUNG MIH GDB: Vicky (duduk tiga kanan) disempulang bala komiti pengatur GDB 2019.

MIRI: Raban bansa Dayak ditu diperansang nyukung Bazar Gawai Dayak (GDB) ninting taun ti deka diatur dalam bulan Mei taun tu.

Taja pia, pengerami makai lemai mantar ngelancharka bazar, diatur Gagasan Anak Dayak Sarawak (GADS) dikena ngiga belanja ungkup bazar nya deka diatur 28 Februari tu.

Presiden GADS, Vicky Gulin Shandom madahka pengerami makai lemai nya kelimpah ari ngiga belanja, mega nyendiaka pelasar dikena ngerapitka sintal kaul enggau nempa serakup antara Gempung Ukai Dikuasa Perintah (NGO) ari pupu raban bansa.

“Tu mega siti awak ungkup GADS ngeneguhka agi pemanah sintal kaul enggau bala NGO ba nengeri tu, kelimpah ari ejensi perintah,” ku iya nambah.

Ba lansa bukai, pengerami mantar ngelancharka GDB kena 28 Februari deka diatur ba Hotel Imperial urung pukul 6.30 lemai.

Pengerami disadang deka dipenyadi Kepala Menteri Datuk Patinggi Abang Johari Tun Abang Openg lalu digulu bala menteri kabinet nengeri sereta mega bala pengari rayat.

Tikit ungkup pengerami makai lemai berega RM650 enggau RM800 semija bisi sepuluh pala diatu benung dijual.

Sida ti bisi ati ulih telefon nuju Clare (013-5661010); Dina Garus (013-8952228) enggau Kelvinson Macringgai (019-8575768) bebelika tikit tauka tanya silik pasal pengerami makai lemai nya.

Ngenang pasal GDB 2019 ti deka diatur berengkah ari 4 nyentuk 25 Mei, nya dipelaba mungkur urung 150 ngagai 200 bansal nyual bemacham bansa pemakai, kraf jari enggau mayuh ke bukai.