SIBU: Ex-chalun Barisan Nasional (BN) Pengawa Bepilih Besai Ke-14 (PRU14) bagi penuduk Parlimen Sibu Dato Andrew Wong Kee Yew ditemu midang ba bilik peninduk iya di Jalai Ipoh, malam hari Minggu.
Apai niang Menteri Wang II Datuk Seri Wong Soon Koh madah, urung pukul 7 pagi hari Minggu, niang enggau raban 4x4 bejalai ngagai Rumah Uka, Tutus, Batang Igan.
“Ngelawa rumah panjai nya iya enggau bala iya ngena jetski urung sejam.
“Iya begulai manah enggau peranak rumah panjai maya nya,” pia ku iya maya berandau enggau media ba rumah iya di Jalai Ipoh ditu, kemari.
Soon Koh madah, niang datai di rumah endang sigi udah lemai lalu terus belelak ba peninduk.
Nangkan ke nya, ku iya, indai niang Datin Sri Pauline Leong ngangauka niang nurun makai tang enda nyaut.
“Urung pukul 9 malam indai niang nengkuk pintu nguji ngangau niang tang nadai ditimbal.
“Udah nya indai niang tama ke bilik peninduk lalu meda niang gali ba lantai,” ku iya sambil madahka iya nadai di rumah maya nya sereta baru datai pagi tadi ari Kuching.
Nangkan ke nya, Soon koh ti mega Menteri Dagang Antarabansa enggau e-Dagang, madah, sida betelefon ngagai sepital luar lalu niang dipadahka nadai urung pukul 11 malam.
Niang, 44, mega ex-Sapit Chairman Opis Kaunsil Sibu (SMC) anak tunggal Soon Koh enggau Pauline.
Niang ninggalka dua iku anak enggau bini.
Ba pekara bekaul, Ketuai Polis Sibu ACP Stanley Jonathan Ringgit madahka kes tu agi mengkang ditasat.
“Kitai mega ngelalau mensia mayuh anang ngaga cherita sebubu ngapa,” pia ku iya ti bela bisi ba rumah Soon Koh.
Iya mega madah, raban polis datai ba rumah nya ari demalam seninjik nerima berita.
Maya PRU14 suba, niang ti ngarika BN ngelaban chalun Parti Tindakan Demokratik (DAP) Oscar Ling ti menang enggau majoriti 11,422 undi.
Dua iku chalun ke bukai maya tu iya nya Simon Tiong Ing Tung (STAR) enggau Tiew Yen Huong (SPP) ti lenyau cengkeram.